Өчигдөр 15:00 цагийн орчимд Нийслэлийн Налайх дүүрэгт долоон настай охин тогонд цохиулж, амиа алдсан харамсалтай хэрэг гарсан. Тодруулбал, тус дүүргийн зургадугаар хороонд байрлах амралтын газрын хойно шонгийн модны тогтой утсанд “Хүүхэд тогонд цохиулж нас барсан байна” гэсэн дуудлага тус дүүргийн цагдаагийн байгууллагад ирсэн байдаг.
Дуудлагын дагуу шалгалт хийхэд амралтын газраас хойш 250 метрийн зайд газар унасан шонгийн модны цахилгаан утсанд долоон настай Н гэгч охин дугуйтай явж байгаад цахилгаанд хүрч тогонд цохиулж нас барсан байсан аж. Хэргийг Налайх дүүргийн цагдаагийн хэлтэст шалгаж эхэлсэн байна.
Охины амь насаа алдсан газарт 220 вольтын тогтой бүдүүн утас газар хөглөрч байжээ. Охин уг утасны тогонд цохиулж нас барсан байна.
