МАХН-ын ээлжит бус Их чуулган хуралдаж байна. Уг хуралдаанаар МАХН-ын 2011 онд батлагдсан дүрэмд тодорхой өөрчлөлт оруулах, мөрийн хөтөлбөрийн заалтуудыг цаг үетэйгээ холбогдуулан шинэчлэх асуудлыг хэлэлцэх аж. Мөн намын дотоод зохион байгуулалтын асуудал болон намын удирдах албан тушаалтнуудыг сонгох, төр иргэдийн дунд тулгарч буй асуудлаар илтгэл тавьж чуулганы гишүүдээр хэлэлцүүлэх юм байна. Хуралд Монгол улсын бүх сум, нийслэлийн дүүрэг хороодоос 1044 төлөөлөгч оролцож байгаа аж.
Хуралдааны явцад нийт төлөөлөгчдийн 99.9 хувийн саналаар Н.Энхбаярыг МАХН-ын даргаар улираан сонгожээ.
МАХН-ЫН ДАРГА Н.ЭНХБАЯР "Манай намын өнгөрсөн хоёрдугаар сард болсон ээлжит Их чуулганаар баталсан намын дүрэм мөрийн хөтөлбөрийг утга төгөлдөр бус шалтгаанаар Дээд шүүхээс бүртгээгүй. Тиймээс бид Их чуулганаа дахин зохион байгуулж байна. Дахиад хуралдаж дахиад бүртгүүлье. Мөн 2011 онд манай намын хурлаар хэлэлцсэн дүрэм мөрийн хөтөлбөр бүгд хүчин төгөлдөр хэрэгжиж байна. Үүнийгээ бид шинэчлэн батална. Хүн хөөх дуртайдаа биш. 2011 онд намын дүрмээ батлахдаа аливааг их сайнаар бодож байсан байна. Намын гишүүд маань АН, МАН-ын гишүүдийн алдааг давтахгүй байх гэж бодсон. Тэгээд гишүүнээ намаас хөөх шийдвэрийг дүрэмд багтаагаагүй. Гэтэл сонгуулийн үеэр намынхаа эсрэг ажиллаж байна. Мөн Эрдэнэтийн 49 хувийн асуудал эсрэг байр суурьтай ажиллалаа. Тиймээс яалт ч үгүй энэ заалтыг оруулахаас өөр аргагүй боллоо. Хариуцлагатай, амласнаа хэрэгжүүлж чаддаг нам болно. Анхаараад алдаа дутагдлаа хүлээвэл бид хамтран ажиллана. МАН, АН дүрмээрээ намын гишүүнээ хөөж байна. Тэгэхээр намын дүрмийн шинэчлэлд намаас хөөх заалт тодорхой хэмжээнд орсон" гэлээ.
