Улаанбаатар хотын Захирагчийн албанаас иргэдийн ая тухтай амьдрах орчин нөхцөл, эрүүл аюулгүй орчинд амьдрах, шөнийн гудамжтай холбоотой зөрчил дутагдал, гомдлыг багасгах зорилгоор тогтмол хяналт шалгалт хийх, үйл ажиллагаатай холбоотой арга хэмжээ авч ажиллах ажлын хэсэг байгуулж, хяналт шалгалт хийж байна.
Энэ сард хийсэн хяналт, шалгалтаар дараах зөрчлүүд илэрчээ. Үүнд:
- Сонгон шалгаруулалтад ороогүй аж ахуйн нэгж, иргэдтэй гэрээ байгуулж үйл ажиллагаа явуулах зөвшөөрөл олгосон,
- Нийтийн эзэмшлийн эд хөрөнгө болох хогийн сав, сандал, гэрэлтүүлэг, баримал зэрэг нь эзэнгүйдсэн, арчлалт хамгаалалтгүйгээс эвдэрсэн, алга болсон,
- Дийлэнх хоол үйлдвэрлэлийн чиглэлээр үйл ажиллагаа явуулж буй аж ахуйн нэгжүүд хуушуур хайрч, шорлог хийж утаа гаргасан,
- Үйлчилгээ эрхлэгч аж ахуйн нэгжүүдийн хоорондын зай хэт ойрхон байгаагаас эмх цэгцгүй байх, иргэдийн ая тухтай үйлчлүүлэх орон зай маш бага,
- Ажилчдын хувцас бүрэн жигдрээгүй, энгэрийн тэмдэггүй, хаяг тодорхой бус байх,
- Цахим баримт буюу НӨАТ-ын урамшуулалт сугалааны баримт олгох пос машин байрлуулаагүй, баримт өгдөггүй, баримт авах санамж байхгүй,
- Аж ахуйн нэгж, иргэд үйл ажиллагаа явуулсан орчны газрын хог хаягдлыг тухай бүрт нь цэвэрлэх, ачуулах үүргийг гэрээнд тусгаагүй зэрэг зөрчилтэй байна.
