УИХ-ын ээлжит бус чуулган зарлан хуралдуулахыг Л.Оюун-Эрдэнэ нарын 25 гишүүн дэмжсэн байгаа. Дээр нь Ерөнхийлөгч ээлжит бус чуулган зарлах саналыг хоёр ч удаа гаргалаа. Харин тов тогтоох эрх зөвхөн УИХ-ын даргад бий. Гэтэл УИХ-ын дарга М.Энхболд энэхүү бүрэн эрхээ хувийн зорилгодоо ашиглаж, хууль зөрчлөө. Ерөнхийлөгчийн Их Хурлыг зарлан хуралдуулах хугацаа 7.30-р дуусав. Хууль тогтоох дээд байгууллагын дарга нь хуулиа зөрчөөд байвал энэ улсад хууль тогтоох,батлах шаардлага байхгүй.
УИХ-ын дарга М.Энхболдын хувьд, нээлттэй сонсгол хийлгэнэ гэдэг бол өөрийнхөө улаан хамгаалагч, дуулгавартай "зарц” Х.Энхжаргалыг АТГ-ын даргаас аваад хаячихсантай утга нэг. Тиймээс ямар ч хамаагүй үнээр авч үлдэхийг хичээж байгаа гэж хэвлэлүүд бичиж байна. Тэгвэл алдарт “60 тэрбум”-ын гэх хэргийг хаацайлж буй түүнийг одоо намын гишүүд нь орхиж намын нэрээ цэвэрлэж шударга үнэний талд зогсохыг илүүд үзэж эхэлсэн гэх мэдээлэл чих дэлсэж эхэллээ. Эх сурвалжаас авсан мэдээллээр УИХ-ын дарга М.Энхболдын өрөөнд түүний талд зогсдог гэх Ж.Мөнхбат, Н.Номтойбаяр, Г.Занданшатар нарын гурван гишүүн орж “60 тэрбум”-ын хэргийг шийдэж намаа цэвэрлэхийг хүссэн бөгөөд эдгээр залуу гишүүд намынхаа нэр хүндийг бодож, нийгэмд “60 тэрбум”ын үнэн худлыг дэнсэлж өгөхийг спикерт тулгасан бололтой.
Сонгууль бүрээр “60 тэрбум”-ын гэх хэрэг сөхөгдөж МАН-ын нэр хүндийг нийгэмд сөргөөр чангааж байгаа энэ үзэгдэл, ард түмний тархийг угааж үнэн худал нь дэнслэгдэхгүй хэтэрхий удаан сунжирч байгаад цэг тавих цаг болсон гэж МАН-ын нийт гишүүд нэгдэж эхэлжээ. Өөрөөр хэлбэл МАН-ын 33:32 –ын бүлгүүд нэгдэж “60 тэрбум”-ын хэргийн үнэн худлыг тогтоохоор болж байгаа сурагтай.МАН-ын залуу,боловсролтой гишүүд зөв шийдлийг сонголоо. “60 тэрбум”-ын хэргийг энэ удаад аргалаад,аргацаагаад өнгөрөөж болох ч 2020 онд бүр илүү хурц,эрсдэлтэй байдлаар дахин сөхөгдөх нь гарцаагүй...
Монголын хамгийн том улс төрийн хүчнийг удирдаж байсан хүний хувьд ч, энэ улсын эрх мэдлийн хоёр оргилд сууж байсан хүний хувьд ч М.Энхболд эх орон, ард түмнийхээ эрх ашгийн төлөө авлига хээл хахуулийг бусармагаар дэмжсэн, төрийн эрх мэдлийг наймаалцсан "60 тэрбумын” гэх хэргийг эцэслэн шийдэхийг дэмжих ёстой.
“60 тэрбум”-ын хэргийг шийдэхгүйгээр шударга ёс, Монгол төрийн цэвэр тунгалаг байдлын тухай ярих боломжгүй. Олон жилийн турш бугшсан МАНАН бүлэглэл энэ цаг үед ямар ч хамаагүй үнээр, ямар ч хамаагүй аргаар бүтцээ хадгалж үлдэхийг хичээж байгаа бол шударга ёсны төлөө хуулийн дагуу тэмцэж байгаа төрийн түшээд маань илүү том зориг гаргах хэрэгтэй болж байх шиг.
