Сэжигтэнээр татагдсан Б.Махбал гэж хэн бэ
2018-08-10 13:04
Зам тээвэр хөгжлийн яамны байранд хүн амины ноцтой хэрэг гарсан талаар мэдээлэл хүргэсэн. Зам тээвэр хөгжлийн яамны сайд Ж.Бат-Эрдэнэ өчигдөр 18.00 цагт хоёр газрын даргадаа үүрэг өгсөн аж. Ажлаа хийж байсан хоёр газрын дарга дээр дахиад хоёр газрын дарга нэмэгдээд дөрвүүлээ архи ууж, архидан согтуурсан аж. Ингээд 21.00 цагийн үед яамны байрнаас дөрвүүлээ гарч, яамны хашаан дотор хоёр нь муудалцаж, маргалдаж улмаар нэгнийхээ аминд хүрчээ. Тодруулбал, Маргалдсаны улмаас Хяналт шинжилгээ үнэлгээ дотоод аудитын газрын дарга Т.Гомбосүрэн амь насаа алдсан байна. Харин хэрэгт сэжиглэгдэн шалгагдаж байгаа хүн нь тус яамны Төрийн захиргааны удирдлагын газрын дарга Б.Махбал аж. Тэрбээр ажилд ороод удаагүй байсан аж. Тэрбээр өмнө нь Уул уурхай яаманд ажиллаж байгаад халагдаж байсан аж.
2018-08-10 12:22
Зам тээвэр хөгжлийн яамны дарга нар ажлын байран дээрээ архидан согтуурч байгаад нэгнийхээ аминд хүрсэн ноцтой хэрэг гараад байгаа билээ. Хэргийн талаар эргэн мэдээлхэд, өчигдөр 22.00 цагийн үед тус яамны Хяналт шинжилгээ үнэлгээ дотоод аудитын газрын дарга Г-г тус яамны Төрийн захиргаа удирдлагын газрын дарга М амь насыг нь бүрэлгэсэн байна.Тус хэргийн талаар ЦЕГ-аас 13.00 цагт мэдээлэл хийхээр болоод байгаа. Тэгвэл энэ асуудалд Зам тээврийн сайд асан М.Зоригт өөрийн цахим хуудаснаа байр сууриа илэрхийлжээ. Тэрээр "Миний санахад яаманд ингэх хүн байхгүй" гэсэн байна.
2018-08-10 11:41
Өчигдөр буюу 8-р сарын 9-ний өдрийн оройн 22:00 цагийн орчимд Зам тээврийн хөгжлийн яамны байр буюу Засгийн газрын 13-р байранд онц ноцтой хүн амины хэрэг гарсан талаар мэдээлэл хүргэсэн билээ. Тодруулбал,
Баттай эх сурвалжийн мэдээлснээр талийгаач нь тус яамны Хяналт шинжилгээ үнэлгээ дотоод аудитын газрын дарга 38 настай Г гэгч байсан бол уг хэргийн сэжигтнээр, мөн яамны Төрийн тусгай удирдлагын газрын дарга 48 настай М-ыг холбогдуулан шалгаж байгаа аж. Энэ талаар ЦЕГ-ын хэвлэлийн төлөөлөгч, мэргэжилтэн М.Мөнхшүрээс тодруулахад “Зам тээврийн яамны байрны гадаа хүн нас барлаа гэсэн дуудлага 21:45 минутад ирсэн. Дуудлагын дагуу цагдаагийн байгууллага хэргийн газарт очиж шалгахад эрэгтэй Г нас барсан болох нь тогтоогдсон. Мөрдөн байцаах үйл ажиллагаа үргэлжилж байна. Хохирогч болон хэрэгт холбогдсон хүний талаарх мэдээллийг өгөх боломжгүй” гэсэн хариултыг өглөө.