УИХ-ын гишүүн М.Билэгт тойрогтоо ажиллах үеэр сонгогчиддоо өгсөн гарын бэлэг нь олны шүүмжлэлд өртөөд байгаа билээ. Учир нь тэрбээр тойргийнхоо сонгогчид хивс, өөрийнхөө зурагтай данс, бакал зэргийг бэлэглэсэн юм. Тэгвэл УИХ-ын гишүүн энэ талаар нэгэн хэвлэлд ярилцлага өгөхдөө ийнхүү ярьжээ.
Тэрбээр "Хонгор нутгийнхаа нэг төлөөллийн хувьд сонгогчдынхоо хүүхдүүдэд жил бүр хувийнхаа зүгээс хичээлийн хэрэглэл гардуулдаг. Улсын мөнгөнөөс аваад бэлэг тараагаад байгаа юм биш. Мэдээж, хотоос очсон хүн ганзага хоосон очдоггүйтэй л адил, сонгогчиддоо гарын бэлэг гардуулсан төдий. Бэлгийн морины шүдийг татдаггүй гэдэг үгтэй. Малчдад хамгийн их хэрэгцээтэй байдаг бакалыг цөөхөн ч гэсэн хүнд бэлэглэчих, цайгаа уудлаад уух, дэвсээд суух хивс, данх өгчихье гэж бодсон.
Тойргийнхоо иргэдтэйгээ уулзах үеэр сугалаа явуулбал тэдэнд маань сонирхолтой байх болов уу л гэж бодсон юм. Монголын ард түмэн данханд цайны дээжээ хийдэг хүндэтгэлтэй эд.
Улс төрийн янз бүрийн буруу зүйлийн лобби, бүлэглэлттэй хамтарч ажиллахгүй, хэн нэгний халаасанд орохгүйгээр төрийн хүн, ард түмний төлөөллийн үүргээ үнэнчээр биелүүлэх гэж зүтгэсний минь хариуд намайг нийгэмд муухай харагдуулах гэж оролдож байгаа нь энэ юм шиг байна" гэжээ.
