-Цалин гэх тоогоо нэмүүллээ гээд эргээд өргөн хэрэглээний барааны үнэ нэмэгдэнэ-
Төрийн албан хаагчдын эрх ашгийг хамгаалах ёстой Монголын үйлдвэрчний эвлэлийн холбоо эсэргүүцэл, тэмцэлд уриалан дуудагч болсон уу. Засгийн газраас багш нарын цалинг тодорхой хувиар нэмсэн ч МҮЭХ үүнийг нь чамлаж ерөнхий боловсролын сургуулиудын багш нарыг зохион байгуулан хугацаагүй ажил хаялт зарлаад байна.
Өчигдөр Сүхбаатарын талбайд Монголын Боловсрол шинжлэх ухааны үйлдвэрчний эвлэлийн холбооноос суулт зохион байгууллаа. Өчигдрийн байдлаар 130 гаруй боловсролын байгууллага ажил хаялтад нэгдсэнээс нийслэлийн 113, хөдөө орон нутгийн 17 байгууллага оролцож байгаа аж. Тэдгээрийн төлөөлөл болсон 5,000 багш ажилчин цуглажээ. Ажил хаялтад хөдөө орон нутгийн сургуулиуд нэгдэж, 174 сургууль ажил хаяхаа мэдэгдэв.
Энэхүү ажил хаялтыг Үйлдвэрчний эвлэлийн холбоо болон зохион байгуулж байгаа хүмүүстээ ашигтай байж болох ч сургууль, цэцэрлэгийн багш нар ажил хаяснаараа 90 гаруй мянган сурагчийн сурах эрх зөрчигдөж, гэртээ "цоожтой" хаалганы цаана үлдэхэд хүрээд байгаа юм. Түүгээр ч зогсохгүй ажил хаялтаас болж үүссэн хичээлийн хоцрогдлыг дараа хэрхэн нөхөх вэ гэдэг асуулт гарч ирж байна.
Хамгийн гол нь эцэг эхчүүд ажлаа хийх боломжгүй болж, аль нэг нь гэртээ үлдэж хүүхдээ харах нөхцөл байдал үүсгээд байгааг тэд бодолцсонгүй. Мөн цалин гэх тоогоо нэмүүллээ гээд эргээд өргөн хэрэглээний барааны үнэ нэмэгддэнэ гэх мэд нийгэмд сөрөг үр дагавар олон гарна гэдгийг бодолцох хэрэгтэй.
-М.Батдорж: Энэ сарын 1-нээс одоо нэмсэн цалин дээр 7-10 хувийг нэмчих гэдэг шаардлага тавьж байна-
Тус жагсаалыг зохион байгуулах ажлын хэсгийн ахлагч М.Батдорж "МҮЭХ-ны байгууллага багшийн цалин нэмүүлэх асуудлыг эхний ээлжид багш нарын цалинг 15 хувиар нэмэх 35 тэрбум төгрөгийг шийдээд өг. Нийгмийн даатгал, татварын журмаар татаас татахад үндсэндээ 20 гаруй тэрбум төгрөг л засгаас шаардагдах юм. Энэ сарын 7-нд томилогдсон ажлын хэсгийг гурав хоног хүлээлээ. Дорвитой нэг ч шийдвэр гаргасангүй. Иймд ажил хаялтыг үргэлжлүүлж байна. Уулзалтыг хангалттай хийсэн, одоо бодит шийдвэр хэрэгтэй байна. Багш нар нэг удаагийн урамшууллаас татгалзаж, Энэ сарын 1-нээс одоо нэмсэн цалин дээр 7-10 хувийг нэмчих гэдэг шаардлага тавьж байна" гэв.
Ийнхүү багш нарын ажил хаялтаас болж 90 гаруй мянган хүүхдийн эрх зөрчигдсөөр байх уу.