Монгол Улсын Шадар сайд Ц.Оюунбаатар тэргүүтэй УИХ-ын гишүүн Д.Ганбат, Ж.Батсуурь нарын гишүүд энэ сарын 13-нд Улаанбаатар-Москва-Берлин чиглэлд нисэх гэж МИАТ-ийнхнийг хүнд байдалд оруулж, өөрсдөө ч онигоонд оржээ. Учир нь тэр өглөө 08 цагт Улаанбаатараас онгоц хөөрөх байжээ. Гэтэл Монгол Улсын Шадар сайд Ц.Оюунбаатар тэргүүтэй УИХ-ын гишүүн Д.Ганбат, Ж.Батсуурь нарын гишүүд ирж өөрсдийн суудлаа голж, нэлээд асуудал үүсгэсэн байна. Зарим нэг нь албан тушаалаараа ч аарахжээ. Сайд, УИХ-ын гишүүд улсаас өгсөн томилолтын зардлаар энгийн суудалд суух онгоцны тасалбар бичүүлсэн атлаа “Бид энгийн суудалд суухгүй. Энэ тасалбараар нэгдүгээр зэрэглэлийн суудалд сууна” хэмээн зүтгэжээ. Улмаар энэ маргааны улмаас нислэг саатсан аж. Ойролцоогоор 25 минут саатжээ. Эцэст нь үйлчлэгч бүсгүй тэдгээр гишүүдийг МИАТ-ийн хэн нэгэн удирдах албан тушаалтантай холбож, өгөхөд МИАТ-ийн удирдлагын зүгээс хуваарьт нислэгт саад болж буй зорчигчдыг ачаа тээштэй нь хамт буулгаж, дараагийн нислэгээр явуул гэх үүргийг онгоцны жолооч, үйлчлэгч нарт өгчээ. Тэр үед Улсын Шадар сайд Ц.Оюунбаатар тэргүүтэй УИХ-ын гишүүн Д.Ганбат, Ж.Батсуурь нар маргалдахаа больж, нислэгээ үргэлжүүлсэн байна. Тэд маргалдаж байх зуураа “Чи биднийг хэн гэж бодоов. Бид УИХ-ын гишүүд. Танихгүй байна уу. Энгийн хүмүүс шиг энд суухгүй, заавал нэгдүгээр зэрэглэлийн суудалд сууна. Үгүй гэвэл онгоцыг чинь хөөргөхгүй” хэмээн томорч байсан тухай хэвлэлүүд онцолсон байна.
Бусад улс орны төрийн сайд, тэргүүнүүд энгийн сууж байгаа тухай цахим ертөнцөөр нэлээд мэдээлэгддэг. Тэр ч бүү хэл өндөр хөгжилтэй орнуудын Ерөнхий сайд нар эконом ангилал буюу энгийн ангилалд сууж яваа талаар иргэд нь өөрсдийн цахим хуудаснаа мэдээлсэн байдаг. Учир нь тэд улсын зардлаар нисч яваа тул улс орноо ч, иргэдээ ч хүндэлсэн хэрэг. Зураг дээр Английн болон Украины Ерөнхий сайдууд энгийн суудалд суун нисч байна. Гэтэл манай улс төрийнхөн, тэр дундаа ард түмнээс сонгогдсон төрийн түшээд “Бид нарыг хэн гэж бодоов. Энгийн хүмүүс шиг энд суухгүй, заавал нэгдүгээр зэрэглэлийн суудалд сууна. Үгүй гэвэл онгоцыг чинь хөөргөхгүй” хэмээн томорч суугааг юу гэж ойлгох вэ? Энгийн суудалд сууж байгаа иргэдийгээ, өөрсдийг нь сонгож, УИХ-д суулгасан сонгогчдыгоо доромжилсон, бассан хэрэг бус уу. Ц.Оюунбаатар энэ удаагийн УИХ-д Н.Энхбаярыг царайчилж байж орж ирсэн. Учир нь МАХН-ынхан дарга Н.Энхбаярыгаа УИХ-ын гишүүн болгохоор хэдэн сар зүтгэсэн. Энэ хооронд Ц.Оюунбаатар “Би УИХ-ын гишүүн болно” гэсээр тангараг өргөсөн хүн. МАН-аас сонгогдсон УИХ-ын гишүүн Ж.Батсуурийн хувьд ч энэ парламентийн асуудалтай гишүүдийн нэг.
Хоёр жилийн өмнө түүнийг УИХ-ын 2012 оны сонгуулиар мөнгө тарааж, парламентад хууль бусаар шургалсан хэмээн цагдаагийн байгууллага шалгаж эхэлсэн. Гишүүний тараасан мөнгийг авсан иргэд өргөдөл гаргаж нотолгоогоо баталгаажуулсан.Нотлох баримтуудыг үндэслэн Ж.Батсуурь гишүүн хууль зөрчсөнийг Говьсүмбэр аймгийн цагдаагийнхан тогтоож, нийслэлийн прокурорын газарт хэргийг шилжүүлсэн. Прокурорын газраас яллах дүгнэлт үйлдэн харьяаллын дагуу Сүхбаатар дүүргийн шүүхэд шилжүүлсэн ч “яллагдагч Ж.Батсуурийг яллах дүгнэлттэй хамт шүүхэд хүлээлгэн өгөөгүй” гэсэн шалтгаанаар хэргийг хүлээн аваагүй. Учир нь, эрхэм гишүүн халдашгүй бүрэн эрхтэй гэдэг үндэслэлээр өнгөрсөн хугацаанд хууль хяналтынхны дуудсан цагт очиж, мэдүүлэг өгөөгүй гэдэг. УИХ-ын гишүүн Д.Ганбатын хувьд иргэд сонсогчдын дунд нэр хүнд нь тийм ч өндөр биш. УИХ-ын танхимд хэлд ордоггүй хэдэн “Королио” байна гэсэн шүүмжлэлд өртсөөр байгаад овоо дуугардаг болсноосоо хойш ирэх сонгуульд үзэх пиараа хийхдээ заримдаа хэтрүүлчихдэг. Цэргийн дүрэмт хувцас, үсний засалт, пилот малгай,өмдний галифе нь нэг хэсэгтээ л цахимд мода болсон. Хамгийн сүүлд Баянхонгор аймгийн сонгогчиддоо усны бидон тараасан гэнэ. Олон нийтийн сүлжээгээр дээрх зураг олны анхаарлыг татаж Д.Ганбат гишүүн ч “бидон” хоч аваад байсан билээ.
