“Ирвэс хамгаалах сан”-гийн биологич мэргэжилтэй Т.Лхагвасүмбэрэл агсны хэргийг Нийслэлийн прокурорын хяналтын прокурор Ж.Отгонцэцэг хянан шалгаж байна. Т.Лхагвасүмбэрэл агсныг амиа хорлосон байж болзошгүй хэмээн Шүүх шинжилгээний үндэсний хүрээлэнгийн шинжээч эмч нар болон цагдаагийн байгууллагаас олон нийтэд мэдээлсэн. Харин талийгчийн ар гэрийнхэн болон хохирогчийн өмгөөлөгч нар дээрх дүгнэлтийг хүлээн зөвшөөрөхгүй, хэн нэгний захиалгаар амийг нь хөнөөлгөсөн хэмээн хардан, хэргийн үнэн зөвийг олж, хэргийг илрүүлж, цаад эзнийг нь олох ёстой хэмээн хуулийн байгууллагад хандаад байгаа юм. Энэ талаар талийгаачийн аав Ж.Төмөрсүх "Нийгэмд ийм мэдээлэл цацчихъя гэсэн санаагаар мэдээлэл хийсэн шиг санагдсан. Гэтэл энэ хэрэг бодит байдалд шал өөр зүйл. Уул уурхайн хятад компанийнхантай хол боотой. Талийгаачийн ажил үүргээ гүйцэтгэж байсан Тост, Тосонбумбын нуруунд зургаан хятад эзэнтэй компани бий. Манай хүн ууланд ажиллаж байхдаа хятад хүмүүстэй маргалдаж байсан талаараа тэмдэглэлдээ бичсэн байдаг. Надад түүнийг гэрчлэх баримт бий. Амьд байхад нь илүү их хангалттай баримт цуглуулж байсан бол байдал арай өөр байх байлаа. Өөрөөр хэлбэл, хэргийг илрүүлэхэд хугацаа алдахгүй байсан. Ер нь энэ хүн амьд байхдаа бидэнтэй уулзаад ярьж байсан асуудлуудыг эргэж бодохоор гарцаагүй хятад компанийн мөнгөөр монгол хүнээр, захиалгаар үйлдүүлсэн хэрэг. Хятадын компаниудтай холбоотой монгол компанийн гар хөл болсон хөлсний алуурчид энэ хэргийг үйлдсэн. Хэргийн гаргалгаа нь энэ. Яаж зохион байгуулсан нь ч их учиртай. Цэрэг, тагнуул, цагдаагийн хүмүүсийн тодорхой заавар удирдлага дор үйлдсэн хэрэг байхыг үгүйсгэхгүй гэж боддог. Яагаад гэхээр хаа байсан Хөвсгөлд аваачсан нь хэргийг төөрөгдүүлэх сонирхол асар их байгаагийн илрэл. Талийгаачийн унаж явсан машин Хөвсгөл орох төв замаар яваагүй нь хүртэл ингэж хардахад хүргэж байгаа. Одоо би цагдаагийн алба хаагчдыг л харж байна. Би бол өөртөө хангалттай баримт цуглуулчихаад байна" хэмээн нэгэн ярилцлагандаа дурдсан байна.
Ж.Төмөрсүх: Хятадын компаниудтай холбоотой монгол компанийн гар хөл болсон хөлсний алуурчид энэ хэргийг үйлдсэн
2016-02-18 17:45:00
