АТГ-аас өчигдөр авлигал өгсөн, авсан 2 хүнийг баривчилсан байна. Тодруулбал, Нэгдүгээр сургуулийн захирал Г..Бум-Эрдэнэ нэгдүгээр ангид хүүхэд элсүүлэх, дунд ангиас хүүхэд шилжүүлэн авахдаа хахууль авдаг байсан гэнэ. Өчигдөр нэгэн иргэн түүнд хахууль өгч байхад нь АТГ-ынхан үйлдэл дээр нь баривчилсан аж. Тиймээс түүнийг хахууль өгсөн хүнтэй нь хамт саатуулсан гэх мэдээлэл гарч эхэлсэн юм.
Энэ талаар АТГ-ын Хэвлэл, олон нийттэй харилцах ажилтан, комиссар Т.Мөнхтунгалагаас тодруулахад " Нэгдүгээр сургуулийн захирлыг АТГ-аас баривчилсан үнэн. Хахууль өгсөн хүнтэй нь хамт баривчилсан. Сургуульдаа хүүхэд элсүүлэхдээ бусдаас удаа дараа хахууль авсан гэх үндэслэлээр шалгагдаж байгаа. Цагдан хорих таслан сэргийлэх арга хэмжээний тухай болон уг хэргийн талаар прокурорын зөвшөөрөлгүй тул албан ёсны мэдээ, яриа тодруулга дэлгэрэнгүй мэдээлэл өгөх боломжгүй байна" гэв.
Мөн эх сурвалжийн мэдээлснээр Захирал Г.Бум-Эрдэнэ нь өнгөрсөн дөрөвдүгээр сард томилогдсон байна.
Д.Болор