Солонгосын их, дээд сургуулиуд руу хамгийн боломжит нөхцлөөр оюутан залуусыг зуучилдаг хэмээн нийгэмд нэлээд нэр хүндтэй гэх "World Korea" группт нэгэн иргэн хулхидуулжээ. Тэд нэг сарын дотор 20 гаруй сая төгрөгөөр хохироод байгаа аж. Найдвартай, олон жил үйл ажиллагаа явуулж байгаа хэмээн өөрсдийг рекламдаж, цөөнгүй урлагийн арга хэмжээг ивээн тэтгэж харагддаг "World Korea" компани одоогоор хэдэн хүнийг ингэж хулхидсан тодорхойгүй байна. Хохирогч Г.Энхномин нөхөр Б.Өгөөмөрийн хамт "Эмчилгээний нэг сарын визийг 3-5 хоногийн дотор нас, хүйс, ажил орлого, нийгмийн даатгал харгалзахгүй гаргаж өгнө" гэсэн зарын дагуу тус байгууллагад ханджээ. Энэ талаар хохирогч Г.Энхноминтой ярилцлаа.
-“World Korea” группт хэдэн төгрөг өгөөд мөнгөө алдсан юм бэ. Юу болсон талаар мэдээлэл өгөөч?
- Өнгөрсөн аравдугаар сарын сүүлээр намайг савандаа хавдартай байж болзошгүй гэсэн дүгнэлт гарсан. Үүнээс хойш зөндөө эмнэлгээр явсан боловч мэдэгдэхгүй мөртлөө хавдартай байна гэсэн онош гарсан учраас энийгээ үзүүлэх гэж л Солонгос явсан юм. Мөн манай нөхөр нуруу суулттай учраас мөн л үзүүлэх гэж байсан. Анх 24 төрлийн шинжилгээг өгнө гэж байсан юм. Анх 2015 оны 12 сарын 07-ны өдөр World Korea" компанийн сайтаар виз түргэн шуурхай гаргана гэсэн мэдээлэл гарсан. Тухайн зарыг хараад нөхөр бид хоёр хандсан юм. Тухайн өдрөө очоод найдвартай гэсэн учраас 1200 ам доллар өгөөд визээ гаргуулсан. Бид хоёрын виз 5 хоногийн дотор гарсан юм. Виз гарсаны дараа бид хоёрыг дуудаж уулзаад одоо “та 2 виз гарсан учраас барьцаа байршуулах ёстой. Буцаад хугацаандаа ороод ирэхэд байршуулсан хөрөнгийг өгнө” гэж хэлсэн. Бид хоёрыг санаа зоволтгүй байршуулсан хөрөнгийг буцаагаад өгнө гэж тухайн үед хэлж байсан. Тэгээд бид Солонгос руу арванхоёр дугаар сарын 30-ны өдөр явсан.
-Та хоёр барьцаа хөрөнгө гэж хэдэн төгрөг үлдээсэн бэ. Одоо хэдэн төгрөгөөр хохироод байна?
-Эмчилгээнд хамрагдах шинжилгээний бүх мөнгө, орчуулагч авах гээд монгол мөнгөөр бодоход 9 сая төгрөг үлдээсэн юм. Дараа нь барьцаа хөрөнгө дээрээ "NISSAN XTRAIL" маркийн авто машин, 5 сая төгрөгийн хамт өгсөн. Хугацаандаа ороод ирсэн тохиолдолд машин, 5 сая төгрөгөө буцаагаад авчихна гэж хэлсэн. Тухайн үед гэрээ байгуулая гэж хэлэхэд “ Манайх найдвартай олон жил үйл ажиллагаа явуулж байгаа учраас манай "World Korea" группт итгэх хэрэгтэй” гээд ямар нэгэн гэрээ байгуулаагүй явсан. Биднийг явахад эмнэлэг, орчуулагч тосно гэсэн юм. Тэгээд л яваад очиход хэн ч биднийг тосоогүй. Тэгээд бид солонгосоор нэг ч үг хэлж чадахгүй, хаашаа хэнд хандахаа мэдэхгүй байсан. Байгаа мөнгөө төлж 10 хоног буудалд байсан. Яг тэгж явахад нэг монгол залуу таарсан юм. Нутаг нэгтэй тэр залууд хамаг зовлонгоо хэлтэл АРБАЙТ буюу хөлсний ажил хийж мөнгө ол” гэсэн. Хоёр гурав хоног ч гэсэн ажил хийгээд эмнэлэг рүү оч гэж зөвлөсөн. Тэгээд ажил хийх гэж байсан эхний өдөр л солонгосын цагдаад баригдсан. "World Korea" группээс та 2 визэндээ санаа зоволтгүй, эмчилгээгээ хийлгэчээд ажил хийж болно гэж байсан. Гэтэл бид очоод цагдаад баригдаад ирсэн.
-Цагдаад баригдана гэхээр тэндээ хоригдсон гэсэн үг үү?
-Тийн. Тэнд долоо хоног хоригдсон. Тэгээд 1 дүгээр сарын 28-ны өдөр наашаа ирсэн юм. Ирсэнийхээ маргааш учир явдлыг тодруулахаар "World Korea" ХХК гүйцэтгэх захирал З.Юмсүрэн гэх эмэгтэйтэй уулзахад "Гар зайл, хохь чинь, юм олж долоохыг чинь харнаа, муусайн гуйлгачид ... гэх мэтээр харааж зүхээд мөнгө өгөх нь бүү хэл машиныг минь хүртэл цагдаад баригдаж ирсэн учраас байгууллагын орлого болгоно" гэж хэлсэн. Үүнээс хойш удаа дараа утсаар ярьсан боловч менежер Нэргүйгээр дамжуулж “захирал З.Юмсүрэн, Солонгос нөхрийн хамт 3 сар хүртэл Солонгос явсан” гэсэн хариуг өгсөн.
-Одоо та аль дүүргийн цагдаагийн хэлтэс дээр гомдол гаргасан байгаа вэ?
-Одоо цагдаад мэдэгдсэн эрүү үүсгээд явж байна. "World Korea" ХХК чинь өөрөө ч виз гаргадаггүй, өөр компаниар гаргуулаад дундаас нь өмнгө завшдаг юм байна. Зөвхөн бид хоёр л гэхэд 20 гаруй сая төгрөгөөр хохироод явж байна. Ингээд цагдаад гомдол гаргаад ирэхээр биднийг нохой шиг хөөж байсан World Korea" компанийн утсаар ярьж маш найрсагаар ирж уулзаач гэж байна. Бид Солонгосоос ирэхээд барьцаа мөнгө, машинаа л авъя гэж гуйсан юм. Монгол хүн байж бидэнд ингэж хандсанд маш их гомдолтой байна.
-Хамгийн боломжит нөхцлөөр оюутан залуусыг зуучилдаг хэмээн нийгэмд нэлээд нэр хүндтэй гэгддэг "World Korea" компанид та хоёроос өөр олон хүн байх магадлалтай юм байна?
Бусад хүмүүс бид хоёр шиг ийм байдалд орох бий. Монголынхоо газар нутаг дээр амьдарч байгаад л Солонгос нөхөртэй, монгол эхнэртэй "World Korea" компанид хулхидуулчихлаа.
"World Korea" ХХК гүйцэтгэх захирал З.Юмсүрэнгийн солонгос нөхөр
