Өчигдөр УИХ-ын гишүүн Ж.Батзандан, Л.Болд, Л.Оюун-Эрдэнэ, Т.Аюурсайхан, Х.Нямбаатар нар чуулганы танхимын үүдэнд мэдээлэл хийсэн. Тэд "УИХ-ын дарга бидний өмнө нь тавьсан огцрох шаардлагыг хүлээ аваагүй. Учир нь бичигт огцор гэсэн үг ороогүй, гишүүд аман хэлбэрээр шаардсан учраас хүлээж аваагүй гэсэн. Тиймээс бид энэ шаардлагаа албан ёсоор гардуулж өгөх гэж байна. Шаардлагад 38 гишүүн гарын үсэг зурсан. Дэмжиж байгаа 40 гаруй гишүүн байна. УИХ-ын дарга М.Энхболд УИХ-ыг даргалах ёс зүйн үндэслэлгүй гэж үзэж, өргөдөл гаргасан" гэдийг онцолсон юм Мөн тэд УИХ-ын 40 гишүүнийг төлөөлж, өчигдөр албан ёсоор өргөдлөө гаргалаа. УИХ-ын дарга маргаашийн дотор огцрохгүй бол бид нийт иргэд иргэний нийгмийн байгууллага хамтран жагсаал цуглаан, тэмцэл хийнэ. Ард түмэнтэйгээ хамт ирээд МАНАН-гийн толгойлогчийг чирч гаргана” гэсэн юм.
Тэгвэл өнөөдөр дахин М.Энхболдыг огцрох хүртэл УИХ-ын үйл ажиллагаанд оролцохгүй гэж мэдэгдсэнээр УИХ-ын чуулганы хуралдааны ирц бүрдэхгүй гацаад байна.
Өнөөдрийн чуулганы нэгдсэн хуралдаан 10.00 цагт эхлэх байсан ч ирц бүрдсэнгүй. Мөн УИХ-ын дарга М.Энхболд чуулганы нэгдсэн хуралдааныг түр хугацаанд удирдахгүйгээ мэдэгдсэн юм. Тэрбээр "Огцруулах бичигт гарын үсэг зурсан 38 гишүүний 34 нь манай намын гишүүд. Гарын үсэг зурсан нөхөд маань хэний хүслийг гүйцэлдүүлж, хэний даалгаварыг биелүүлэх зорилготойгоо ихээхэн тунгааж, бодсон байгаа даа. Би хууль ёсоор УИХ-ын даргад нэр дэвшиж, сонгогдсон. Энэ ажил, албан тушаалыг өгөхөд надад зууралдах зүйл байхгүй. Гэхдээ би бүх үйл явдал, тэр тусмаа парламентад болох үйл явдал хуулийн дагуу явагдах ёстой гэж үздэг. Тиймээс нэр бүхий гишүүдийн тавьсан шаардлагыг Төрийн байгуулалтын байнгын хороонд шилжүүлсэн байгаа. Миний хувьд хууль зөрчсөн ямар нэг үйлдэл хийгээгүй гэдэгтээ бат итгэлтэй байна. Өнөөдөр үүсээд байгаа нөхцөл байдлыг дүгнэж, Төрийн байгуулалтын байнгын хороо асуудлыг хэлэлцэж, дүгнэлт гаргатал чуулганы нэгдсэн хуралдааныг удирдахгүй" хэмээн хэллээ.