2016 оны УИХ-ын сонгуульд ялагдал хүлээснээс хойш нам чимээгүй байсан Монгол Улсын Ерөнхий сайд асан Н.Алтанхуяг цаг үеийн асуудлаар мэдээлэл хийж байна. Тэрбээр мэдээллийн эхэнд "Монголчууд бид бол арга ухаан эр зориг эв нэгдлээрээ үнэт зүйлээ хамгаалж, нэг сэтгэлээр зүтгэх цаг ирээд байна. Төр нь иргэдийнхээ боломжийг хулгайлж, нам нь мафижсан бүлэглэл болж иргэдийн итгэлийг алдаж байна. УИХ-ыг ёс зүйн чадамжгүй хэмээн үзэж, нэн даруй тараах тэмцлийг эхлүүлье. Монголын баялгийг хууль бусаар эзэгнэх үйл явцыг зогсоох хэрэгтэй байна. Эрх мэдэлтнүүдэд ээлтэй, ард түмэнд халтай хуулийн засаглалыг халж, дараа нь намуудыг өмчгүй болгох хэрэгтэй.
Стратегийн ордуудаас орж ирдэг мөнгийг нэгтгэж сан бий болгоё. Авлигачдын мөнгийг төр хурааж аваад гэр хорооллыг орон сууцжуулахад зарцуулна. Маргаашаа бий болгох бүтээн байгуулалт хийцгээе.
Би АН-ын гишүүн хэвээрээ байгаа. Гэхдээ сэтгэл дундуур байгаа. Учир нь АН монголын нийгэмд бугшсан зүйлсийг арилгахад дорвитой ажиллахгүй байна. Бид дэндүү явцуу байна.С.Баяртай хамтарч Засгийн газар байгуулсан. Гэхдээ хамтарсан Засгийн газар байгуулах нь МАНАН байгуулахаас тэс өөр. Хамтраад эх орныхоо төлөө ажиллая л гэсэн.Харин 2004 онд хамтарсан Засгийн газар байгуулагдсан нь МАНАН-гийн эхлэл байсан. Би МАНАН-г байгуулахад оролцсон бол өдийд энд байхгүй, гадуур зугаалаад л явж байх байсан. Би улстөрчдөд хэтэрхий их шунал тачаалаа дараач гэж хэлмээр байна.
Авлигын диваажинг хувьчилж авсан хүмүүсийг хариуцлага тооцох болжээ. “60 тэрбум”-ыг бий болгосон М.Энхболдтой хариуцлага тооцох ёстой. УИХ-ыг тараах ёстой. Нийслэлийн газрыг зарсан бүлэг этгээдтэй хариуцлага тооцъё. Шударга бусын хонгилыг нурааж, тэгш журамт ёсыг сэргээх цаг ирлээ. Дахин хэлье. Гурван төрлийн ажлыг яаралтай хийх хэрэгтэй.
Нэгдүгээрт, Шударга ёсыг сэргээе
Хоёрдугаарт, байгалийн баялгийг ард нийтийнх болгоё
Гуравдугаарт, Чинээлэг дундаж давхаргыг сэргээе
Эхний асуудлын цаана таван зүйл бий.
Хууль хяналтын салбарын хууль бусын хонгил нийгмийн бүх салбарт үсэрхийлсэн байна. “60 тэрбум”-ыг дэмжигчдийг шударга шүүхийн өмнө аваачих ёстой.
" хэмээн хэллээ.