Идэр есийн хүйтэнд “МАНАН дэглэмийн эсрэг” 25.000 хүн жагсаж байна

УИХ-ын дарга М.Энхболдыг огцрохыг шаардсан "МАНАН дэглэмийн эсрэг монгол түмний нэгдэл" эсэргүүцлийн жагсаал яг одоо төв талбайд болж байна. Тус жагсаалд 25,000 хүн оролцож байгаа талаар жагсаал зохион байгуулагчид мэдээлэл өглөө. Мөн цагдаагийн байгууллагын удирдлагууд жагсаалын үеэр шалган нэвтрүүлэх цэг ажиллуулж, иргэдийг хуулийн дагуу үзэл бодлоо илэрхийлэхэд нь дэмжлэг үзүүлж ажиллаж байна. Энэ нэгдлээс УИХ-ын даргыг өөрийн хүсэлтээр огцрохыг шаардсан. Хэрэв шаардлагыг биелүүлэхгүй бол Монгол орон даяар эсэргүүцлийн тэмцэл зохион байгуулна гэдгийг Т.Аюурсайхан нарын таван гишүүн мэдэгдэж байна. 

Уг тайван жагсаалд УИХ-ын гишүүн Л.Оюун-Эрдэнэ "-30 хэмийн хүйтэнд монголчуудыг ингэж олуулаа цуглахгүй гэж дарга бодсон. Гэхдээ бид олуулаа цуглаж чадлаа. Өчигдрийн Монгол, өнөөдрийн Монгол өөр болж байна. Бид М.Энхболд гэдэг хүнтэй муудаад байгаадаа биш, ирэх 25 жилд байх тогтолцоогоо өөрчлөхийн төлөө тэмцэж байна. Идэр есийн хүйтэнд 20 мянгуулаа цуглаж байна. Ард түмний хүч, албан тушаалтны дээр байдаг гэдгийг мэдэх жил байх ёстой. Шинэ 25 жил эхэлсэн байна.М.Энхболд даргаа таны эхнэртэй адил бүсгүйчүүд ирсэн байна, таны хүүхэдтэй адилхан залуус ирсэн байна. Эдгээр олон хүнийг гадаа бүү удаан хүлээлгэ. Даруй огцрох өргөдлөө өгөхийг шаардаж байна. Бид одоо Төрийн ордон руу орж, 48 цагийн шаардлагын хариуг авах гэж байна. Хэрэв хариу өгөхгүй бол эсэргүүцлийн хоёр дахь давалгааг орон даяар эхлүүлнэ. Суулт зарлана, цаашлаад тэмцлийн хурц хэлбэрийг сонгоно" хэмээн хэллээ. Мөн  Их аварга Д.Дагвадорж  "Идэр есийн жавар тачигнасан хүйтэнд ард түмнээ хараад сэтгэл өндөр байна. Энэ үед эр хүн, чоно хоёрын хийморь сэргэдэг юм шүү, М.Энхболд оо. Сэтгэл сайтай учраас бид өдийг хүртэл хүлээж байна. Одоо ордноос гараад огцор. Бид арай дэндүү уужим сэтгэлтэй, арай дэндүү зөөлөн байна" хэмээн сэтгэгдэлээ илэрхийллээ. 

Дөнгөж сая жагсаалд оролцогчдын төлөөлөл болж УИХ-ын зарим гишүүн УИХ-ын дарга М.Энхболдод өгсөн шаардлагын хариуг авахаар Төрийн ордон руу орсон. Харин УИХ-ын дарга М.Энхболд жагсаалд оролцогчдын төлөөлөл болох УИХ-ын гишүүдийг хүлээж авч уулзсангүй.