Өнгөрсөн аравдугаар сард “Mongolia’s next top model” /MNTM/ нэвтрүүлгийн оролцогч, "Монгол модель" агентлагийн загвар өмсөгч Ч.Чамин-Эрдэнэ зуурдаар таалал төгссөн билээ. Тус хэргийг хууль хяналтын байгууллага шалгаж байгаа бөгөөд эцсийн дүгнэлт хараахан гараагүй байна. Тэгвэл тус хэргийн талаар "Боловсрол" суваг телевизийн найруулагч мөн “Mongolia’s next top model” шоуны шүүгч Нора, Энхболд нар өнөөдөр мэдээлэл хийлээ.
"Боловсрол" суваг телевизийн найруулагч н.Дамдинсүрэн :
“Mongolia’s next top model” шоу нэвтрүүлгийн хугацаанд оролцогч охидууд гэрээсээ, интернэт ертөнцөөс тусгаарлагдмал 2 сарын хугацаанд тусдаа амьдардаг. Энэ хугацаанд янз бүрийн асуудал бэрхшээл гардаг. Гэхдээ сошиал ертөнцөөр хүмүүсийн яриад байгаа шиг хэн нэгнийг үзэн ядсан, хэн нэгнийг хурцадмал байдалд оруулсан тохиолдол байгаагүй. Нэвтрүүлэгт 16 охин оролцсоноос 5 охин шалгарч үлдээд байсан. Харамсалтай нь тэдний нэг болох талийгаач Ч.Чамин-Эрдэнэ нас барсан харамсалтай хэрэг гарсан. Энэ 2 сарын хугацаанд гоё нэвтрүүлэг гаргах, охидууддаа гоё дурсамж үлдээхээр бид бүхэн баг болон хамтарч ажилласан. Хэрэг явдал болсон өдөр миний бие болоод манай хамт олны төлөөлөл гэр бүлийнхэнтэй нь очиж уулзсан. Телевизийн зүгээс тус 16 охид хэн нэгнийгээ үзэн ядсан янз бүрийн асуудал үүсээгүй гэдгийг албан ёсоор мэдэгдэж байна.
“Mongolia’s next top model” шоуны хөтлөгч, шүүгч Д.Нора:
Энэ нэвтрүүлгийн шүүгч хөтлөгчийн хувьд тодорхой мэдээлэл хийе гэж бодлоо. Талийгаачийг нас барсанд үнэхээр харамсаж байгаа. Боловсрол суваг телевиз болон манай загварын ертөнцийнхний хувьд нөхөж баршгүй том гарз учирсан. Манай нэвтрүүлгийн оролцогч, шүүгчдийн хувьд талийгаачтай 2 сар хамт амьдарч нэвтрүүлгээ хийсэн. Талийгаачийг нас барсныг сонсоод үнэхээр шоконд орсон. Миний хувьд талийгаачийг нас барах үед би Хятад улсад ажилтай явж байсан. Олон нийтийн сүлжээгээр намайг талийгаачийнд очиж эмгэнэл илэрхийлээгүй гэсэн мэдээлэл их гарсан. Намайг байхгүй үед нэвтрүүлгийн хамт олны төлөөлөл ар гэрт нь очиж уулзаж эмгэнэл илэрхийлсэн. Мөн сошиал ертөнцөөр нэвтрүүлгийн оролцогч Э.Одонтунгалаг руу маш их дайрч байгаа. Э.Одонтунгалагийн хувьд “Mongolia’s next top model” шоуны нэг хэсэг, нэг оролцогч шүү дээ. Нэвтрүүлгийн оролцогчид бие биенээ үзэж ядсан юм байхгүй ээ. Манай загварын ертөнцөд ч гэсэн ийм зүйл байхгүй. Э.Одонтунгалаг 18 настай, талийгаачаас ч дүү жоохон охин. Сошиал ертөнцөөр цацагдаж байгаа тус мэдээллээс болж Э.Одонтунгалаг хичээлдээ явахгүй, гэрээсээ ч гарч чадахгүй байна гэсэн. Тийм учраас та бүхэн үнэн худал нь мэдэгдэхгүй мэдээлэл битгий цацаач ээ. Энэ хүний буруутай эсэхийг хууль хяналтын байгууллага л тогтооно. Мөн гадуур нэвтрүүлгийн ялагч тодорхой болсон, наад нэвтрүүлгээ зогсоо гэсэн мэдээлэл гарч байгаа. Тус мэдээлэл худлаа шүү гэдгийг хэлмээр байна.
“Mongolia’s next top model” / шоуны шүүгч Э.Энхболд:
Миний хувьд талийгаачтай маш олон зураг авалтанд оролцож байсан, сайн мэднэ. Гэнэн цайлган, сайхан сэтгэлтэй үнэхээр ур чадвартай охин байсан. Харамсалтай үйл явдал болсон гэдгийг сонсоноос хойш өнөөдрийг хүртэл сэтгэл санааны хувьд маш хүнд байгаа. Шүүгч нарыг ар гэрт очиж эмгэнэл илэрхийлээгүй гэсэн дайралт их явсан. Миний хувьд хэрэг явдал болсон гэдгийг сонсоод Болормаа багш болон Боловсрол суваг телевизийн хамт олонтой холбогдсон. Бидний төлөөлөл гэрт очиж ар гэрийнхэнтэй уулзсан. Миний хувьд үнэхээр гэрт орж чадаагүй, гадаа нь байсан. Үнэн худлыг нь мэдэхгүй байж хэн нэгнийг битгий гүтгэж доромжлооч ээ гэж хэлмээр байна.
.jpg?1751336683043)
.jpg?1751336552317)
