“Алтан Дорнод Монгол” компанийн захирал Т.Ганболд “Манай компанийн данснаас 4 сая ам.доллар тухайн үеийн Ерөнхий прокурор Д.Дорлигжавын төрсөн дүүгийн дансанд шилжсэн нь үнэн” хэмээн мэдэгдсэн нь дуулиан дэгдээсэн. Харин үүний араас Ерөнхий прокурор асан Д.Дорлигжав үүнийг гүтгэлэг, андуурал хэмээн мэдэгдээд байгаа. Өчигдөр Авлигатай тэмцэх газраас Хууль зүйн сайд асан Д.Дорлигжавын гэрт нэгжлэг хийсэн талаар мэдээлэл гарсан. Тэгвэл энэ сарын 7-8-ныг шилжих шөнө үүрийн 04:20 цагт Хууль зүйн сайд асан Д.Дорлигжавыг түүний төрсөн дүү Д.Баатарын хамт ШШГЕГ-ийн харъяа 461-р урьдчилан хорих ангид цагдан хорьсон талаар эх сурвалж мэдээллээ. Д.Дорлигжавыг “Алтан Дорнод Монгол” компанийн захирал Т.Ганболдоос их хэмжээний авлига авсан байж болзошгүй асуудлаар АТГ-аас өнгөрсөн оны сүүлчээр эрүүгийн хэрэг үүсгэн шалгаж эхэлсэн юм. Тэгвэл энэ асуудлаар “Алтан Дорнод Монгол” компанийн захирал Т.Ганболд “Цензургүй яриа” нэвтрүүлэгт оролцлоо. Энэ асуудлаар юу ярьж, ямар тайлбар хийсэнийг дараах “ОНЦЛОХ ИШЛЭЛ”-ээр хүргэж байна.
- Би 4 сая долларын баримтыг Х.Тэмүүжинд өгсөн
- Тухайн үед Ерөнхийлөгч Ц.Элбэгдоржид таньдаг хүнээр нь дамжуулж 4 сая долларын баримтаа үзүүлсэн ч шалгаагүй.
- “Алтан Дорнод Монгол” компани надад амжилт, алдааг аль алиныг нь дагуулсан.
- Төр засгийн энэ их дарамтыг тооцоогүй. Би улс төрийн бүлэглэлд байгаагүй.
- Энэ бол мөрдөн байцаалтад явж байгаа асуудал. Гэхдээ тайлбар хийх хэрэгтэй байх. Энэ 4 сая ам.доллар бол Д.Дорлигжавын авсан мөнгөний тодорхой хэсэг нь.
- Хууль энэ хяналтын байгууллага дээр бусад бүтэн хэмжээгээрээ шалгагдаж байгаа. 4 сая ам.доллар бол олон нийтэд ил гарсан хэсэг нь
- Улс төрчдийг бүгдийг танина. Мэдээж хэрэг нөхцөл байдал дээр ойрхон байсан хүн бол УИХ-ын гишүүн асан Дэмбэрэл. Энэ хүн бол энгийн шударга хүн.
- Би багаасаа ер нь толгой дааж явж ирсэн. Үнэнээр явбал үхэр тэргээр туулай гүйцнэ гэж үг байдаг. Хүч бол үнэний талд байдаг. Үүнд би итгэж байна. Би ийм л өвөөгийн өвөрт өссөн.
- Өнөөдөр би дээрэлхүүлж зодуулж байна. Гэхдээ бөмбөрцөг бөөрөнхий гэдэгт итгэдэг.
- Д.Дорлигжав 800 мянган ам долларын хэргийг замхаруулж л чадсан хүн шүү дээ. Одоо намайг гүтгэсэн гэж арай хэлэхгүй байлгүй дээ.
- Д.Дорлигжав ард түмнийг ингэж доромжилж болохгүй. 27 жил доромжилж явсаар байгаад одоо дасал болсон.
- Төрд ажиллаж байсан хүмүүс яаж ингэж баяждаг юм бэ. Энэ чинь ердөө хулгай.
- Би өөрөө АТГ-т өргөдөл өгсөн. Холбогдох нотлох баримтыг бүгдийг нь гаргаж өгсөн.
- Мөнгөнүүдийг шилжүүлсэн баримт бүгд надад байгаа.
- Авлигал гэдэг чинь ажлаа бүтээх гэж өгсөн мөнгийг хэлдэг юм. Харин энийг бол дээрэм гэдэг юм.
- Анх Х.Тэмүүжинд итгэж бүх баримтуудаа өгсөн. Анх очихдоо би Х.Тэмүүжинг таньдаггүй байсан. Шударга залуу гэж бодож очсон.
- Монгол Улсын Ерөнхий прокурор ингэж болохгүй ш дээ. Өөрийгөө төрд зүтгэж байгаа гэдгээ ухамсарлах хэрэгтэй. Хугацаатай гэдгээ ойлгох хэрэгтэй.
- Д.Дорлигжав хуучны, ховор машины цуглуулгатай. Охин нь үнэтэй цүнхнүүдээр номын сан шиг цуглуулгатай байсан.
- Э.Бат-Үүл гээд нэг цагаан үстэй чоно гарч ирээд манай найз бид хоёр хонь иддэггүй юм гэж ард түмнийг доромжилсон.
- Д.Дорлигжав байгалийн жаахан тэнэгдүү хүн
- “Алтан Дорнод Монгол”-ыг авсныхаа таксыг төл гэсэн. Би төлөхгүй гээд шоронд орсон.
- “Жаст”-ын Ш.Батхүүг дэмж гээд том албан тушаалтнууд, баргил хоолойтой хүн ярьдаг байсан.
- Би бүтээгдэхүүн зээлээр өгөхгүй гэдгээ тодорхой хэлсэн учир Ш.Батхүү Төмөрлөгийн үйлдвэрийн данс руу 15 сая доллар шилжүүлсэн байсан.
- Би гадагшаа явчихаад ирсэн чинь Дарханы төмөрлөгийн үйлдвэрийн данснаас энэ 15 сая долларын гүйлгээг миний гарын үсэггүйгээр хийсэн байсан. Уг нь би нэгдүгээр гарын үсгийн эрхтэй байсан.
- Ц.Элбэгдоржийг 2008 онд АНУ-аас ирчихсэн гэр оронгүй явж байхад нь би буудалдаа жил орчим бусдаас нууж хаагаад байлгаж л байлаа. Дараа нь бас хагас лааз өшиглөөд явж байхдаа над дээр ирж л байсан.