Өнгөрсөн аравдугаар сард загвар өмсөгч Ч.Чамин-Эрдэнэ амиа алдсан харамсалтай хэрэг гарсан билээ. Хэрэг гарсанаас хойш өнөөдрийг хүртэл хууль хяналтын байгууллага шалгаж байгаа бөгөөд хэргийн эцсийн дүгнэлт гараагүй байгаа юм. Хэдхэн хоногийн өмнө талийгаач охины ээж Г.Чимгээ болон болон Охид, эмэгтэйчүүдийн эрх ашгийг хамгаалах “Охидын түүх” ТББ-аас мэдээлэл хийсэн юм. Энэ үеэр талийгаач охины ээж Г.Чимгээ хэлэхдээ “Охиныг маань өөрөө амиа хорлосон болгож, хэргийг хаах гэж маш их оролдож байгаа. Би үүнтэй санал нийлэхгүй. “Molgolian next top model” шоу нэвтрүүлэгт оролцож байгаа Одонтунгалагийн ээж яагаад маанийн ерөөлөө тайлбарлахгүй байна вэ. Одонтунгалаг миний охиныг дарамталж байсныг охин маань надад хэлсэн. Миний охин худлаа ярихгүй. Тэр охиныг харахаараа л айдаг байснаа хэлж байсан. Би охиндоо итгэдэг. Миний охин тийм ч дуугүй хүүхэд биш. Хэлье гэснээ хэлчихдэг шударга охин байсан. Эрүүл чийрэг биетэй. Гэтэл цагдаагийнхан хар тамхинд хутгах гэж үзэж байна. 16 настайгаасаа л Нэмэхбаяр гэдэг залуутай үерхэж байсан. Гэтэл энэ залууг одоо хүртэл яагаад шалгахгүй байгаа юм. Энэ залуу одоо хаана байна. Охины минь 49 хоногоор ч зул бариагүй хүн шүү дээ. Би энэ залууг сэжиглэж байгаа. Нэмэхбаярыг энэ хэрэгт огт холбоогүй гэж байгааг гайхаж байна. Би шүүх эмнэлгийнхэнд гомдолтой байна. Энэ хэрэг үнэн зөвөөр шийдэгдэхгүй бол би тэр жижигхэн цонхоор өөрөө ч болов унаж, 10 хэдэн давхраас унасан хүн ямар байдгийг харуулахаас өөр арга алга. Цагдаа, шүүх эмнэлэг яагаад ийм худал дүгнэлт гаргаад байгаа юм бэ. Миний охин архи уудаггүй, тамхи татдаггүй байсан. Гэтэл арай дэндүү юм. Дотор эрхтэнийг нь зарсан ч юм уу хэн мэдлээ. Би хэзээ ч шүүх эмнэлгийн дүгнэлтэд итгэхгүй. Би 15 давхраас унасан хүн ямар байдгийг цагдаагийнханд харуулмаар байгаа юм. Гэвч тэд 11 настай хүүгийн минь асран хамгаалаад арыг минь дааж чадах юм уу. Миний охин бүрхэг, дуугүй хүн байгаагүй. Эрүүл чийрэг биетэй, шударга охин байсан. Гэтэл одоо цагдаагийнхан хар тамхинд хутгах гэж оролдож байна. Нэвтрүүлгийн оролцогч Одонтунгалаг болон талийгаач Ч.Чамин-Эрдэнийн найз залуу Нэмэхбаяр хоёроос охиныхоо амийг нэхнэ" хэмээн хэлсэн.Тэгвэл уг хэрэгт нэр нь холбогдоод байгаа Э.Одонтунгалаг ээжийн хамт өчигдөр Учиртай урилга нэвтрүүлэгт оролцож энэ асуудлаар анх удаа өөрсдийн байр сууриа илэрхийллээ.
MNTM шоуны оролцогч Э.Одонтунгалаг
Нэвтрүүлгийн үеэр маргалдсан зүйл гарсан. Бие биенээ таньдаггүй 16 охин нэг гэрт байрлаж нэвтрүүлэгт оролцсон. Бие биенээ таньж мэддэггүй учраас нэгнээ ойлгохгүй, маргалдсан зүйл гарсан. Маргалдсаныхаа дараа би талийгаач Ч.Чамин-Эрдэнээс өөрөө уучлалт гуйсан. Талийгаач байрнаасаа зугтаж байсан. Нэвтрүүлгийн оролцогчид өглөө сэрээд л байрнаасаа зугтсаныг мэдсэн. Тэгээд 3 цагийн дараа телевизийн байранд эргэж ирсэн. Тухайн үед телевизийн баг хамт олон болон бид нарт талийгаач ямар нэгэн тайлбар хэлээгүй. Дараа нь нэвтрүүлгийн хамт олонд талийгаач байрнаасаа гарч явснаа тайлбарлахдаа “эмээ маань хагалгаанд орох гэж байгаа. Эмээдээ санаа зовоод гарч явсан” гэж хэлсэн байсан. Мөн нэвтрүүлгийн дундуур талийгаач тэмцээнээс гарах хүсэлт хүртэл тавьж байсан. Нэвтрүүлгийн оролцогчид тухайн үед талийгаачтай хамт ярилцаж байсан. Тэмцээнээс яагаад гарах болов, энэ хүртэл явж ирсэн юм чинь үлдэж болохгүй юм уу гээд хамтдаа ярилцаж байсан.
MNTM ШОУНЫ ОРОЛЦОГЧ Э.ОДОНТУНГАЛАГИЙН ЭЭЖ Г.НАРАНЧУЛУУН
Намайг маань маань мэгзэм уншсан гэсэн буруу ойлголт яваад байгаа. 9-р сарын 18-нд бид найзуудаараа нийлж дуу хийлгэсэн юм. Охидуудынхаа байранд очдог өдөр чинь 9-р сарын 26. Тэгээд "мастеринг хийгээд дуусчихсан байна. Чи хаана байна?" гэхээр нь хүлээгээд сууж байна гэсэн. Тэгээд "завтай байвал энийг нэг сонсоодхооч" гэхээр нь тэрийг нь би гүйлгэж сонссон юм. Тэнд байсан ээжүүд, эмээ нараас би "надад нэг чухал ажил байна аа, энийг нэг сонсоодохмоор байна" гээд чихэн дээрээ тавиад сонссон. Тэрийг л маанийн ерөөл гээд ойлгочихсон юм шиг байгаа юм Талийгаачийн ар гэрийн хүмүүсийн ярьж байгаа шиг маанийн ерөөл тавиад арц хүж уугиулсан юм байхгүй.