Өнөөдөр Хан-Уул дүүргийн Эрүүгийн хэргийн анхан шатны шүүхэд Хууль зүйн сайд асан Д.Дорлигжав нарын цагдан хорих асуудлыг саналын дагуу хэлэлцэх шүүх хурал боллоо. Гэвч шүүгдэгч талын өмгөөлөгч нар шинэ нотлох баримт гаргаж танилцуулах хүсэлт гаргасны дагуу хурлыг энэ сарын 16-ны өдрийн 11:00 цаг хүртэл хойшлууллаа. Хууль зүй, дотоод хэргийн сайд асан Д.Дорлигжав болон түүний төрсөн дүү Д.Баатар, туслах Ч.Бямбаа нарыг ШШГЕГ-ын харьяа Урьдчилан хорих 461 дүгээр ангид анхан шатны шүүхийн шийдвэрийн дагуу нэг сарын хугацаатай цагдан хорь буй. Гэвч уг шийдвэрийг Д.Дорлигжавын өмгөөлөгч Д.Оросоо, А.Ууганбаяр нар үндэслэлгүй хэмээн үзэж, Хан-Уул дүүргийн Эрүүгийн хэргийн анхан шатны шүүхийн ерөнхий шүүгчид гомдол гаргасан билээ.
