Энэ сарын 08-нд Улсын ерөнхий прокурор асан Д.Дорлигжавыг төрсөн дүүгийнх нь хамт Цагдан хорих 461 дүгээр ангид хорьсон билээ. Түүнийг “Алтан Дорнод Монгол” компанийн захирал Т.Ганболдоос их хэмжээний авлига авсан байж болзошгүй хэргээр хуулийн байгууллага шалгаж байгаа юм. Тэгвэл энэ асуудлаар яг одоо Ерөнхий прокурор асан Д.Дорлигжавын өмгөөлөгч мэдээлэл хийлээ.
Өмгөөлөгч Э.Амархүү "Т.Ганболд болон манай үйлчлүүлэгч Д.Дорлигжав нарын хэн нь шударга үнэний төлөө бодит үнэнийг мэдээлж байгааг телевизийн нэвтрүүлгүүдийн үеэр дэлгэсэн баримтуудаас харж болно.
Хууль зүйн сайд асан Д.Дорлигжавыг дахин гэмт хэрэг үйлдэж болзошгүй гэж үзээд цагдан хорьж байгаа. Хүнийг эрхэлж байсан ажил, боловсролоор нь ялгаварлах ёсгүй. Бидний зүгээс Д.Дорлигжавыг цагдан хорих ямар ч үндэслэл байхгүй гэж үзэж байгаа. Цагдан хорьсон нь хууль бус гэж үзэж байна" хэмээн хэллээ.