.jpg?1548576391890)
Ярыгиний нэрэмжит Гранпригийн эмэгтэйчүүдийн 68 кг-ын жинд “Лондон-2012” олимпийн наадмын хүрэл медальт, ДАШТ-ий хошой алт, нэг мөнгөн медальт, “Хилчин” спорт хорооны тамирчин, хөдөлмөрийн баатар, гавьяат тамирчин Соронзонболдын Батцэцэг алтан медаль хүртэж, тус тэмцээний хошой аварга боллоо. Өнгөрсөн жил ДАШТ-д жин өгсч, 68 кг-д зодоглох болсон С.Батцэцэг хоёр дахь тэмцээндээ ийнхүү түрүүлэв. Тэрбээр 2015 онд тустэмцээнд аваргалж байсан бөгөөд дөрвөн жилийн дахин өнгөллөө. С.Батцэцэг Красноярскт Японы Рио Ватариг 8:3-аар, нутгийн дүү нар болох ОУХМ Э.Дэлгэрмааг 3:0-ээр, спортын мастер Э.Даваанасанг цэвэр ялсан юм.
Энэ жинд Монголын гурван бүсгүй алт, мөнгө, хүрэл медаль хүртэцгээв. “Алдар” спорт хорооны тамирчин Энх-Амарын Даваанасан Гранпригээс анхны мөнгөн медалиа хүртсэн.
Өнгөрсөн долоо хоногт тус хотод болсон Миндиашвилигийн ОУТ-д түрүүлсэн “Хасу-Мегастарс” клубийн тамирчин Энхсайханы Дэлгэрмаа хүрэл медалийн төлөөх барилдаанд “Инчёнь-2014” Азийн наадмын аварга Японы хашир туршлагатай бөх Ватариг 4:3-аар илүүрхснээр долоо хоногийн дотор “давхар цохилт” хийсэн юм.
