УИХ-ын намрын ээлжит чуулган өндөрлөөгүй байгаа ч гишүүд сар шинийн босгон дээр тойрогтоо яаравчлан бэлэг тараажээ. Тэд алтын төлийн эзэн, аварга малчины шагналыг гардуулахаас гадна гурил, будаа бэлэг сэлт ч тарааж яваа талаар олон нийтийн цахим хуудсуудад мэдээлжээ. УИХ-ын гишүүн, Ардчилсан Намын ҮБХ-ий гишүүн Б.Наранхүү ноднин жилээс эхлэн өөрийнхөө сонгогдсон тойрог буюу Дундговь аймгийн ахмадуудад бэлэг өгч эхэлсэн билээ. Тодруулбал тэрээр: "Дундговь аймгийн 70-аас дээш насны 1588 ахмад буурлуудад сар шинийн гарын бэлэг болох цаг тооны бичиг, 50 кг гурил, 25 кг будааг гардуулах тул Сайнцагаан сумын иргэд 2018 оны хоёрдугаар сарын 10 ны 10 цагт аймгийн Ардчилсан намын байрны гадна талбайд, бусад 14 сумдын иргэд тухайн сумын Ардчилсан намын байрнаас 2018 оны 02 сарын 10, 11-ний өдрүүдэд хүрэлцэн ирж гарын бэлгээ гардан авна уу.” гэсэн зар тараасан байсан юм.
Энэ тэндгүй бэлэг тараалаа гэсэн мэдээлэл цацагдсан ч ахмадуудад бэлэг тараах үеэр нэгэн харамсалтай хэрэг гарчээ. Тодруулбал, хоёрхон хоногийн өмнө УИХ-ын гишүүн, "Оргил"-ын гэх тодотголтой Ж.Ганбаатар Баянгол дүүргийн өндөр настангуудыг хүлээн авсан юм. Улаанбаатар паласын их танхимд болсон уг хүлээн авалтад заал дүүрэн хүн цугларсан аж. Уг үйл ажиллагааны эхэнд Оргилын Ж.Ганбаатар "баахан" өөрийгөө рекламдсан аж. Эцэст нь гар цайлгах бэлэг гардуулах мөч болоход бужигнасан олны хөлд 83 настай хөгшин дарагдаж, ухаан алдсан байна. Хэдийгээр түргэн тусламж ирж хөгшнийг эмнэлэг хүргэхээр яаравчилсан ч эмнэлэг рүү явах замдаа амьсгал хураасан ийм ноцтой хэрэг гарчээ. 83 настай буурайгийн амиа өгөн байж авахыг хүссэн тэр гарын бэлгийн уутанд ердөө бэлэг дурсгалын зүйлээс гадна 2 кг гурил, 1 кг будаа, 1 кг чихэр байсан аж. Ийм ч өчүүхэн бэлэгний төлөө ахмадуудад амиа өгөн байж тэмцэж байна. Энэ талаар УИХ-ын гишүүн Ж.Ганбаатар ямар нэгэн тайлбар өгөөгүй байна.
.jpg?1751336683043)
.jpg?1751336552317)
