УИХ-ын гишүүн Ж.Батзандан, Л.Болд, Л.Оюун-Эрдэнэ, Т.Аюурсайхан, Х.Нямбаатар, Д.Мурат нар УИХ-ын даргыг огцруулах асуудал болон түүнтэй холбогдох улс төрийн цаг үеийн асуудлаар мэдээлэл хийлээ. Энэ үеэр УИХ-ын гишүүд “Баялагтаа эзэн Монгол” хэмээх бүлэг байгуулж байгаагаа албан ёсоор мэдэгдсэн юм.
Мэдээллийн эхэнд УИХ-ын гишүүн Т.Аюурсайхан “Улс оронд үүсээд байгаа хүндрэл бэрхшээл нь газрын хэвлийн баялгаа буулгаснаас үүдэлтэй. Өнөөдөр төр нь баялгаа мэдэхээ больсон байна. МАНАН бүлэглэл, харийнхны гарт орсон байна. Монголын ард түмэн баялагтаа эзэн нь болохын тулд бид “Эрдэнэт”-ийн 49 хувь хууль бусаар хувийн хэвшилд очсоныг төрийн мэдэлд авах шийдвэр гаргасан. Уг нь УИХ-ын тогтоол өөр хэлбэртэй гарах гэж байсныг бид нөхдийнхөө хамт тэмцэл өрнүүлж байж Монголын төрд буцааж авахуулсан юм.
Үүний дараа Монголын ард түмнийг 200-300 жил тэжээх Тавантолгойн нүүрсний ордын 50 хувийг БНХАУ-ын аж ахуйн нэгжид 400 сая ам.доллараар өгөх гэж байсан юм. Үлдсэн 50 хувийг нь Монголын нүүрсчдийн бүлэглэлд олгох гэж байсныг бид авч үлдсэн. Үүний үр дүнд ард түмэн ногдол ашгийг нь хүртэхээр хүлээж байна" хэмээн хэллээ.
