ЖДҮХС-гаас өөрийн эзэмшлийн болон хамаарал бүхий компаниараа дамжуулан зээл авсан асуудлаар УИХ-ын гишүүн Б.Ундармаа, Д.Дамба-Очир, Л.Энхболд, Г.Солтан нарыг шалгаж, улмаар бүрэн эрхийг нь түдгэлзүүлэх саналыг Улсын Ерөнхий Прокурорын газраас УИХ-д хүргүүлсэн ч УИХ өнгөрсөн нэгдүгээр сарын 11-ний өдрийн хуралдаанаараа тэднийг хамгаалан авч үлдсэн билээ.
АТГ-аас өгсөн тайлбараар бол дээрх гишүүд дуудсан цагт ирдэггүй, тогтоолтой танилцахгүй зэрэг асуудал гаргадаг байсан гэдэг. Харин одоогоор УИХ-ын гишүүн Г.Солтан л яллагдагчаар татах тогтоолтой танилцаагүй байгаа юм байна. Тэрээр томилолттой, завгүй зэрэг шалтгаан хэлсээр өдийг хүрсэн бөгөөд удахгүй гадагшаа томилолтоор явах гэж байгаа бололтой. Тиймээс АТГ-аас түүнд хилийн хориг тавиулах асуудлыг хөндөж эхэлсэн гэнэ.
