ШШГЕГ-ын харьяа цагдан хорих 461-р ангид 48 цагийн хугацаатай хоригдсон шүүгдэгч Б нь амь насаа алдсан хэрэг гараад байгаа. Талийгаач нь авлига, албан тушаалын хэргээр АТГ-т шалгагдаж байсан гэдгийг АТГ-аас мэдээллэсэн. Мөн талийгаач Шүүхийн ерөнхий зөвлөлд шүүгчээр ажиллаж байсан 67 настай Л.Бямбаа гэгч аж. Тэрбээр тэтгэвэртээ гарсан байжээ. Талийгаачийг Салхитын мөнгөний ордтой холбоотой хэргээр шалгаж байсан байна.
Энэ хэргийн талаар ШШГЕГ-аас 461-р ангид шүүгч амиа алдсан хэргийн талаар тайлбарыг тус байгууллагын тэргүүн дэд дарга, хурандаа Д.Дамдинцэрэн "Иргэн Л.Б-г Эрүүгийн хуулийн тусгай ангийн 22.4 дүгээр зүйлийн 4 дэх хэсэг, 22.5 дугаар зүйлийн 1 дэх хэсэгт заасан гэмт хэрэгт сэжиглэн, эрх бүхий байгууллагаас 48 цагийн хугацаатай баривчилж, холбогдох хууль, журмын хүрээнд 2019 оны 02 дугаар сарын 22-ны өдрөөс Цагдан хорих 461 дүгээр ангид саатуулан шалгаж байсан. Түүнийг энэ сарын 23-ны өдрийн 21:40 минутын орчимд иргэн Л.Б нь ганцаараа байрлах хорих өрөөндөө өөрийн хувцсаар хоолойгоо боосон байдалтай амь насаа алдсан.
Тухайн хорих ангид хяналт, шалгалтын ажилтан давхар болон өрөөнүүдийг нэгдсэн нэг дэлгэцээр хянадаг. Хорих ангийн харуулууд сэрэмж алдсан байхыг үгүйсгэхгүй. Зарим өрөөнд байрлуусан камерууд өрөөг бүхэлд нь харуулах боломж жаахан хомс байдаг. Үүнтэй ч холбоотой байж магадгүй. Цагдан хорих 461 дүгээр ангийн давхар, өрөө болгонд хяналтын камер байгаа.Гэхдээ нэг хянагч тухайн давхрын бүх өрөө буюу 20-30 хорих өрөөг хянадаг. Хорих ангийн дотоод журмаар техникийн болон биечилсэн хяналтыг байнга тавьж өгдөг. Албан хаагч болон давхрын харуул ажлын байрандаа байсан. Цагдан хоригдож байгаа этгээдийг хорих ангийн дотоод журмын дагуу гадуур болон дотруур хувцастай нь оруулдаг. Үүний дагуу талийгаачийг хувцастай нь оруулсан.
Тухайн хүн хоригдох амралтын өдөр таарсан. Хоригдах хугацаа нь дуусаагүй байсан. 21,40 минутын үед амиа алдсан. Шөнийн 00:00 цагт хугацаа нь дуусах байсан. Одоогоор урьдчилсан байдлаар ямар нэгэн мэдээлэл өгөх боломжгүй. Одоогоор дээрх асуудалд Цагдаагийн байгууллагаас Эрүүгийн хэрэг үүсгэн шалгаж байгаа тул дэлгэрэнгүй мэдээлэл өгөх боломжгүй
. Өнөөдрийн байдлаар ШШГЕГ-аас албаны шалгалт явуулж байгаа. Шалгалт явагдаж дууссаны дараа дүнг үндэслэн буруутай албан хаагчид холбогдох хууль журмын дагуу хариуцлага тооцоно. Өчигдрөөс ШШГЕГ-аас томилогдсон ажлын хэсэг албаны дотоод шалгалтыг эхлүүлсэн" гэв.
Д.Нэргүй.
