Өнгөрсөн амралтын өдөр Урьдчилсан хорих 461-р хорих ангид хоригдож байсан шүүгч Л.Бямбаа амиа хорлож нас барсан талаар мэдээлэл хүргэсэн билээ. Тодруулбал, Монгол Улсын гавьяат хуульч, шүүгч Л.Бямбаа саатуулагдсан үедээ амь насаа алдсан юм. Энэ талаар АТГ-ын Мөрдөн шалгах хэлтсийн ахлах мөрдөгч, ахлах комиссар Ч.Жаргалбаатараас тодруулахад " Тус хэлтсээс Салхитын мөнгөний орд газрыг эзэмшигч компани болон ашиглаж байсан ашиглагч нарын маргаанаас үүдэлтэйгээр хууль хяналтын байгууллагын хууль сахиулагчид тухайн маргааныг шалгаж байх явцад ихээхэн мөнгөн хөрөнгийг хээл хахуульд өгсөн гэмт хэрэг бүртгэгдсэн. Үүнтэй холбогдуулан, тус хэрэгт мөрдөн шалгах ажиллагааг явуулж байсан. Шалгалтын явцад нэр бүхий хүмүүст хээл хахууль өгсөн байж болзошгүй үндэслэл тогтоогдоод энэ хэрэгт талийгаачийг сэжиглэн 48 цагийн хугацаагаар баривчилсан байсан. Мөрдөн шалгах байгууллагаас талийгаачийн гэр, ажилд нь нэгжлэг хийж хэрэгт ач холбогдол бүхий баримтуудыг хурааж авсан. Хураагдсан баримтуудын хүрээнд хууль зүйн үндэслэл тогтоогдсон учраас сэжигтнээр баривчлаад 48 цагийн хугацаа нь дууссаны дараа авахаар очиход ийм харамсалтай хэрэг гарсан байсан" гэсэн хариултыг өгсөн.
Улсын онцгой объект буюу ШШГЕГ-ын хорих, саатуулах байранд иргэн амь насаа алдсан гэх шалтгаанаар ШШГЕГ-ын дарга, бригадын генерал Ц.Амгаланбаяр ажлаа өгчээ. Гэхдээ зарим эх сурвалжийн мэдээллээр ШШГЕГ-ын дарга Ц.Амгаланбаяр өнгөрсөн долоо хоногт ажлаа өгөх гэж байсан аж. Учир нь Ц.Амгаланбаяр бол УИХ-ын дарга асан М.Энхболдын ойр дотны хүмүүсийн нэг. Тиймээс М.Энхболдын араас түүнийг халах гэж байсан талаар зарим эх сурвалж мэдээлэл өглөө.