Засгийн газрын өнөөдрийн хуралдаанаас гаргасан шийдвэрийн талаар ЗГХЭГ-ын дарга Л.Оюун-Эрдэнэ мэдээлэл хийлээ. Өнөөдрийн Засгийн газрын хуралдаанаар 2016 оны 9 дүгээр сарын 9-ний өдрийн 32 дугаар тэмдэгдэл Эрдэнэт үйлдвэр ХК болон Монголросцветмет ХК-ийн талаар зарим арга хэмжээний тухай гэх тэмдэглэлийг нууцаас гаргахаар шийдвэрлэсэн байна. Энэ талаар ЗГХЭГ-ын дарга Л.Оюун-Эрдэнэ “2016 оны 9 дүгээр сарын 9-ний өдрийн 32 дугаар тэмдэгдэл Эрдэнэт үйлдвэр ХК болон Монголросцветмет ХК-ийн талаар зарим арга хэмжээний тухай гэх тэмдэглэлийг нууцаас гаргахаар болсон. Нууцаас гаргах хэд хэдэн шалтгаан бий. 1973 оны 11 сарын 22-ны өдөр Эрдэнэт үйлдвэрийг хоёр улсын гэрээ хэлэлцээрийн дагуу байгуулагдсан байдаг . Хамгийн сүүлийн үеийн мэдээллээр 62 жилийн нөөцтэй стратегийн орд гэдэг техник эдийн засгийн үндэслэл гарсан. 2016 оны 9 сарын 9-ний өдрийн ЗГ-ын хаалттай 32 дугаар тэмдэглэлээр Аж үйлдвэрийн сайд Д.Эрдэнэбат тухайн үед танилцуулга хийж, Монгол Улсын ЗГ хөрөнгө оруулах боломжгүй учир давуу эрхээсээ татгалзаж, Монголын Зэс корпорацид худалдах тухай танилцуулгыг хийсэн байна.
Тэгэхээр өнөөдрийн нууцаас ил гарсан материалаар Худалдаа хөгжлийн банк, Монгол Зэс корпораци нь хоорондоо санхүүгийн болон удирдлагын хувьд хамааралтай гэдгийг тухайн үеийн хурал дээр Орхон захирал өөрийн амаар хэлж байсан нууцын материалууд байгаа юм. Үүнээс маш олон зүйл харагдана” хэмээн хэллээ.
