ШШГЕГ-аас Цагдан хорих 461 дүгээр ангид саатуулагдаж байсан эмэгтэй амиа алдсан хэрэгтэй холбоотойгоор албаны дотоод шалгалт явуулсан талаар мэдээлэл хийлээ.
ШШГЕГ-ын дарга Ц.Амгаланбаяр "ШШГЕГ-ын даргын тушаалаар Ерөнхий газрын тэргүүн дэд даргаар ахлуулсан ажлын хэсэг байгуулж, 461 дүгээр хорих ангид шалгалтын ажил хийсэн. Шалгалт хийх үед үүрэг гүйцэтгэж байсан харуул хамгаалалтын ажилтнууд хариуцлагагүй хандсан, сонор сэрэмж алдсан, ээлжийн дарга, ерөнхий эргүүл нарыг хяналтаа сулруулсан нь шалгалтаар тогтоогдсон. 461 дүгээр хорих анги бол маш том анги. Зөвхөн нэг, хоёрдугаар давхар нь гэхэд бусад ангиудтай тэнцэхүйц хэмжээний ачаалалтай байдаг. 24 цагийн турш хөл хөдөлгөөн ихтэй байдаг тул анхаарал, сонор сэрэмж өндөр хэмжээнд байхыг шаарддаг. Шалгалтын дүнг хэлэлцээд 461 дүгээр ангийн дарга, харуул хамгаалалт эрхэлсэн дарга, холбогдох ажилтнуудыг албан тушаалаас нь чөлөөлсөн" гэлээ.
Мэдээллийн дараа тэрбээр сэтгүүлчдийн асуултад хариуллаа.
-Заавал цагдан хорих ёстой байсан уу. Гадуур байцааж болоогүй юм уу?
-Түүнийг манай байгууллага мэдэхгүй.
-Хэрэг гарснаас хоёр цагийн дараа цагдаад дуудлага өгсөн гэсэн. 2 цагийн дараа дуудлага өгсөн шалтгаан юу ву?
-Ажлын байрны хариуцлага алдсантай холбоотой гэдгийг би түрүүн тодорхой хэлсэн.
-Яг ямар хариуцлага алдсан бэ. Ажлын байр дээрээ байхгүй байсан юм уу?
-Ерөнхийдөө сонор сэрэмж алдсан, хяналт сулруулан ажлын хариуцлага алдсан. Өөр асуултанд хариулт өгөх боломжгүй.
|
|
