ЗГХЭГ-ын дарга Л.Оюун-Эрдэнэ, УИХ-ын гишүүн Ж.Батзандан, Л.Болд нарын гишүүд Эрдэнэт үйлдвэрийн 49 хувийг “Монголиан коппер корпорэйшн” ХХК-д худалдахыг дэмжсэн ОХУ-ын Засгийн газрын шийдвэр болон Монгол Улсын засгийн газрын хуралдаанаар энэ талаар хэрхэн ярилцсан тухай тэмдэглэлийг ил болгож байгаа талаар мэдээлэл хийлээ. Тэд мэдээллийнхээ эхэнд “Эрдэнэт үйлдвэр” ХХК-ийн 49 хувийн хувьцаа худалдан авахад зарцуулсан 400.270.000 долларын эх үүсвэрийг бүрдүүлсэн схемийг танилцуулсан юм.
Энэ талаар ЗГХЭГ-ын дарга Л.Оюун-Эрдэнэ “Эрдэнэт” үйлдвэрийн хувийг худалдаж авсан хөрөнгийг дөрвөн эх үүсвэрээс босгосон байна. Санхүүгийн схем хэрхэн боссон талаар тайлбарлая.
- -Сангийн яамны виксел /2016.02.25/ 183.6 тэрбум төгрөг “Кью Эс Си” ХХК
- -Монголбанкны өрийн бичиг /2014.11.28/ 100 тэрбум төгрөг “Кью Эс Си” ХХК-д
- -Монголбанкны өрийн бичиг /2016.04.06/ 100 тэрбум төгрөг “Кью Эс Си” ХХК-д
- -Хөгжлийн банкны зээл /2014.12.01/ 71.3 сая ам.доллар “Кью Эс Си” ХХК
- -Хөгжлийн банкны зээл /2015/ 51.3 сая ам.доллар “Кью Эс Си” ХХК-д
“Кью Эс Си” ХХК нь Дарханы төмөрлөгийн үйлдвэртэй холбоотой бөгөөд захирлаар Э.Шижир, ТУЗ-ийн даргаар Д.Эрдэнэбилэг ажилладаг.Улмаар “Кью Эс Си” ХХК-иас Д.Эрдэнэбилэгийн үеэл дүүгийн “Хээдвей трейднг”, “Пик девелопмент” компаниудаар дамжуулан “Монголын зэс корпораци”-ийн захирал Ц.Пүрэвтүвшингийн дансанд 2016.04.21-нд 56.5 сая ам.доллар орсон байна. Мөн 2016.06.20-нд 62.9 сая ам.доллар орсон" хэмээн хэллээ. Засгийн газрын хуралдаанаар хэлэлцсэн нууцын зэрэглэлтэй материалууд ил болсноор хуулийн байгууллага шалгах боломж бүрдэнэ гэв.
