Нарантуул захад гарсан галын талаар албаныхан мэдээлэл өгөхдөө галын дуудлага 101 утсанд үүрээр, тодруулбал 03:39 цагт ирсэн, гал унтраах ангийнхныг очиход түймэр өргөн хэмжээнд тархсан байсан тул онцгой байдлын албаны 100 гаруй албан хаагч, нийслэлд буй гал унтраах ангийн 90 гаруй хувийг дайчлан ажиллуулсан. Галын тархалтыг өглөөний 04:50 цагт зогсоосон ч 07:00 хүртэл үргэлжлүүлэн ажиллаж бүрэн унтраасан. Галд нийт 95х60 м буюу 5700 мкв талбай өртжээ. Үүнээс 53х40 м буюу 2500 гаруй мкв талбай галд шатсан гэдгийг мэдээлсэн. Тэгвэл галтай холбогдуулан хэвлэлийнхэн Нарантуул худалдааны төвийн энэ Ш.Сайхансамбуугаас тодруулга авчээ. Тэрбээр “Энэ бол угаасаа анхны тохиолдол биш гэдгийг хүн бүр мэдэж байгаа. Өмнөх жилийн гал түймэр бас л үүрээр гарсан шүү дээ. Энэ бол явуулга, санаатай хэрэг гэж үзэж байна. Угаасаа энэ хэргийг хийдэг хорлон сүйтгэгч байгааг би мэдэж байгаа. Гэтэл цагдаагийнхан тэр этгээдийг олохгүй, ажлаа хийхгүй байна. Би өөрөө яваад гүйгээд ямар ч нэмэр тус алга байна. Харин түрээслэгч, худалдаачдын хохирлыг барагдуулахгүй. Учир нь манайх тэдэнтэй хийсэн ямар ч гэрээ байхгүй. Хийж ч байгаагүй. Би тэдэнд бараагаа битгий гадаа тавьж бай гэж хэлдэг байсан” гэсэн байна.
Ш.Сайхансамбуу түрээслэгч, худалдаачдын хохирлыг барагдуулахгүй гэдгээ мэдэгдлээ
2016-03-03 14:11:00
