Өчигдөр УИХ-ын Хууль зүйн байнгын хорооны хуралдаанаар Улсын Их Хурлын гишүүн Л.Болд С.Зориг агсныг хөнөөсөн хэрэгтэй холбогдуулан “Түр хороо байгуулах тухай” УИХ-ын тогтоолын төслийг хэлэлцүүлэх нь зүйтэй гэсэн горимын санал гаргасныг хуралдаанд оролцсон гишүүдийн олонх дэмжсэн. Харин өнөөдрийн УИХ-ын нэгдсэн чуулганаар хэлэлцэх асуудлын өмнө УИХ-ын гишүүн Л.Болд "С.Зориг агсны амь насыг бүрэлгэсэн асуудлыг шалгах түр хороо байгуулах асуудлыг хойшлуулахгүйгээр эхэнд нь хэлэлцэж өгөөч" гэсэн хүсэлт тавьсан юм.
Тус хүсэлтийн дараа УИХ-ын гишүүн Ц.Нямдорж:
"Олон улсын парламентийн холбоо энэ асуудалд анхаарахыг сануулсан. Гадныхан энэ хэрэгт анхаараад байхад мэдсэн ч мэдээгүй юм шиг явсаар байгаад гурван жилийн нүүр үзэж байна. Тийм учраас түр хороо байгуулах асуудлыг өнөөдөр хэлэлцүүлэхийг хүсч байна. 2016 оны намар С.Зоригийн амь насыг хохироосон хэргийн шүүх хурал болохоос өмнө би МАН-ын бүлгийн хурал дээр энэ хэрэгт анхаарахгүй бол болохгүй гэж анхааруулж байсан. Гэвч миний төсөөлж байснаас ноцтой юм болсон байна. Энэ түр хороонд зөв юмны араас явдаг цөөхөн хүн оруулж өгөөч гэж хүсч байна. Миний ярьж байгаа зүйл энэ хэргийн өчүүхэн хэсэг нь шүү. Ийм асуудлыг хэлэлцэхгүй бол бид энд суугаад хэрэг алга. Миний өнөөдрийг хүртэл ярьсан зүйл наад балмад зүйлийн чинь өчүүхэн хэсэг нь шүү. Цаашид үзэх юм бол маш их балмад юм гарна. 70, 80 хүрсэн эмээ нар дээр гүйцэтгэх ажил явуулсан байна, ийм байж болох уу. Бид бүгд эхээс төрсөн хүмүүс. Яаж айл гэр сүйтгэж, айлгаж дарамталж байсан гээд асуудал гарна" гэсэн юм.
УИХ-ын гишүүн Л.Болдын гаргасан саналын дагуу санал хураалтыг гар өргөн явууллаа. Ингээд Л.Болд, Ц.Нямдорж нарын гаргасан С.Зоригийн амь насыг хохироосон хэргийг шалгах түр хороо байгуулах асуудлыг өнөөдрийн чуулганы хуралдааны хэлэлцэх асуудлыг дараалалт оруулахыг дэмжив.