Өнгөрсөн амралтын өдрүүдэд нийслэлийн ногоон бүсэд хэд хэдэн түймэр гарч, багагүй хэмжээний гарз хохирол дагуулсан. Тухайлбал шар өвс шатаасны улмаас энэ сарын 13-ны өдөр Богд уулын Богинын аманд түймэр гарч, түймэрт 5 га талбай өртсөн бол 14-ны өдөр СБД-ийн 19-р хороо “Гоодойн ам”-д түймэр гарч, түймрийн улмаас 13 айлын зуслангийн байшин, 3 гэр, 15 га талбай шатаад байна. Мөн энэ сарын 15-ны өдөр Чингэлтэй дүүргийн 19-р хороо Шадивлан зусланд түймэр гарч, түймрийн улмаас 4 айлын зуслангийн байшин шатаж ихээхэн хэмжээний гарз хохирол учирсан билээ. Харин түймрийн энэ голомтод нийслэлийн шинэхэн дарга сельфидэж, шинэхэн албан тушаалаа олон нийтэд зарласан байна. Тодруулбал, Нийслэлийн Агаар орчны бохирдлын асуудал хариуцсан төслүүдийн удирдагчийн ажлаа саяхан авсан Д.Мөнхжаргал дүрэлзэн шатаж буй байшингийн өмнө өөрийн зургаа авч сельфидээд зогссон байна. Д.Мөнхжаргал дарга тун удалгүй эдгээр зургуудаа цахим хуудаснаасаа устгажээ.