УИХ дахь Ардчилсан намын зөвлөлийн дарга Д.Эрдэнэбат болон УИХ-ын гишүүд Олон Улсын Парламентын холбооны тэргүүн Габриела Күвас Барронтай албан уулзалт хийлээ. Уулзалтын үеэр Төр нийгмийн зүтгэлтэн Ардчилсан намын Дэд дарга Г.Батхүү агсаны учир битүүлгээр амиа алдсан хэрэгтэй холбогдуулан Олон улсын парламентын холбоонд хүсэлт хүргүүлсэн юм. Энэ үеэр талийгаачийн дүү Г.Батсайхан "Төрийн өндөр хамгаалалт бүхий Төрийн ордон дотор амь насаа алдсан хэрэг өмнө нь болж байгаагүй. Мөн ах минь эрүүл саруул хуралд оролцсон. Хурал дууссанаас хойш уг хэрэг явдал тохиолдсонд гэр бүлийн зүгээс гүнээ харамсан, яаралтай үнэн зөв шийдүүлэх хүсэлтэй байна. Тиймээс Олон Улсын Парламентын холбооны зүгээс уг асуудалд хөндлөнгийн хяналт тавин хамтран ажиллахыг хүсэж байна" хэмээн Олон улсын парламентын холбооны тэргүүн Габриела Күвас Барронд хүсэлтээ гаргалаа.
Мөн Г.Батхүү талийгаачийн үхлийн шалтгааныг тогтоох шүүх шинжилгээний байгууллагын шинжилгээний урьдчилсан дүгнэлт гарсан байна. Урьдчилсан дүгнэлтээр талийгаачийг өвчний улмаас нас бараагүй гэж гарсан байна. Өөрөөр хэлбэл цус харвах, зүрхний шигдээс болох зэрэг гэнэтийн байдлаар амиа алдаагүй гэсэн дүгнэлт гарчээ. Задлан шинжилгээний урьдчилсан дүгнэлтийн талаар УИХ-ын гишүүн, Хууль зүйн сайд асан Х.Тэмүүжин мэдээлэл өглөө. Тэрбээр “Та бүхэн шүүхийн шинжилгээний урьдчилсан дүгнэлтүүдийг сонсон байх. Зүрх хаагдсан болон цус харвалтын үйл явц байхгүй. Өндрөөс унасан буюу хүнд гэмтлийн улмаас нас барсан. Унах болсон шалтгаан нь маш учир битүүлэг байна. Өөр янз бүрийн мэдээллээр ямар нэгэн маргаан болсон гэх таамаглал маш хүчтэй явагдаж байна. Энэ таамаг, учир битүүлэг явдлуудыг илрүүлэхэд манай цагдаагийн байгууллага улс төрийн нөлөөллөөс ангид үйл ажиллагаа явуулж чадах эсэх нь эргэлзээтэй. Тийм учраас хууль хяналт, мөрдөн шалгах үйл ажиллагаанд хөндлөнгийн хяналт байж гэмээн асуудлыг үнэнээр нь тогтооно гэж үзэж байна” гэв.
