Эдийн засагч Л.Наранбаатар Ерөнхийлөгчийн Тамгын газрын дарга асан, АН-ын даргын зөвлөх З.Энхболдын хууль бус үйл ажиллагаатай холбоотой баримтыг өнгөрсөн сард дэлгэнтүүнийг АТГ, Эрүүгийн цагдаагийн газар болон ТЕГ-т шалгуулах хүсэлт гаргажээ. Гэсэн ч эдгээр газруудаас татгалзсан хариу өгчээ. Иймд энэ удаад дахин мэдээлэл хийж, З.Энхболдтой холбоотой ноцтой баримтуудыг дахин дэлгэлээ.
АН-ын даргын зөвлөх асан З.Энхболд улс төрийн нөлөөгөө ашиглан хамаарал бүхий нэгдмэл, бизнесийн ашиг сонирхол нэгтэй хүмүүсээрээ дамжуулан Монгол Улсад их хэмжээний хохирол учруулсан байж болзошгүй гэж Эдийн засагч Л.Наранбаатар үзэн “Хишиг-Арвин”, “Страто” компанийг шалгуулах хүсэлт гаргасан боловч АТГ, нийслэлийн прокурорын газраас “З.Энхболд эдгээр компанид хувь эзэмшдэггүй тул шалгахгүй гэсэн” хариу өгчээ.Энэ тухайд эдийн засагч Л.Наранбаатар тэрбээр “З.Энхболд мангас болчихжээ. Хууль хүчний байгууллагынхан түүнээс айдаг болсон байна.Түүнтэй холбоотой үнэн бодит баримтуудыг дэлгээд байхад хууль хүчнийхэн шалгахгүй байгаа нь ямар учиртай юм бэ” хэмээн тодотгож, түүнтэй холбоотой баримтуудыг дурдлаа.
2016 оны сонгуулиар З.Энхболдын менежерээр “Страто” компанийн гүйцэтгэх захирал А.Баттүшиг ажилласан нь яалт ч үгүй нотлох баримт учраас дахин АТГ шалгуулахаар өгч буйгаа мэдэгдлээ. Тэрбээр З.Энхболд болон түүний төрсөн дүү З.Хишигтогтох нартай 20 гаруй компани хамааралтайг хэлж, “Страто” компаниас тэдний хамаарал бүхий хүмүүс цалин авдаг тухай ярилаа. Тодруулбал, 2018 оны аравдугаар сараас З.Энхболдын эхнэр Т.Бат-Өлзий, эхнэрийнх нь дүү Т.Батдэлгэр нар цалин авч эхэлсэн бол З.Энхболдын төрсөн дүү З.Хишигтогтох тэднээс өмнө есдүгээр сараас эхэлж, одоог хүртэл цалин авч байгаа аж.
“Страто” компанийг 2015 оны долоодугаар сард байгуулжээ. Үүнээс хэдхэн сарын өмнө буюу дөрөвдүгээр сард З.Энхболд “Тавантолгой” компанийн хөрөнгө оруулалтын гэрээг унагааж, “Эрдэнэс тавантолгой” компани дээр 30 сая тонны хүчин чадалтай баяжуулах үйлдвэр байгуулах боломжийг хаасан байна. Үүнээс болж өнөөдрийн эдийн засгийн тооцоогоор 8.4 тэрбум ам.долларын экспортын орлого алдагджээ.