2020 оны УИХ-ын сонгуульд нэр дэвших нам, эвсэл, бие даагчид СЕХ-нд баримт бичгээ хүргүүлэх хуулийн хугацаа өчигдрийн 00.00 цагт дууслаа. Өчигдөр Ардчилсан намын дарга С.Эрдэнэ нэр дэвшигчдийнхээ материалыг бүрдүүлж, СЕХ-нд 11.30 цагт хүлээлгэн өгсөн бол 13.00 цагт МАН-ын 76 нэр дэвшигчийн баримт бичгийг хүлээлгэж өгөхөөр тус намын сонгуулийн штабын менежер Я.Содбаатар тэргүүтэй хүмүүс СЕХ-нд ирсэн билээ.
Удалгүй ХҮН, СДН, Зүй ёс намын нэгдэл болох “Зөв хүн электорат”, МАХН, ИЗНН, МУНН-ын “Та, бидний эвсэл”-ийнхэн нэр дэвшигчдийнхээ материалыг тус тус хүргүүлэн өгсөн юм.
СЕХ энэ сарын 17-20-нд 09.00-17.00, 21-нд 09.00-00.00 цагийн хооронд нэр дэвшигчдийн баримт бичгийг хүлээн авсан юм. УОК-оос ирүүлсэн зөвлөмжийн дагуу нэр дэвшигчид, материал хүлээн авагчид амны хаалт зүүж, бээлий өмсөн уг үйл ажиллагааг зохион байгуулав.