Нийслэлийн Засаг дарга бөгөөд Улаанбаатар хотын захирагч Э.Бат-Үүл Гэр хорооллын дахин төлөвлөлтийн төслийн явц болон түүнийг тойрсон маргаантай асуудлын талаар өнөөдөр сэтгүүлчидтэй “зангиагүй уулзалт” хийлээ.
Нийслэл гэр хорооллын дахин төлөвлөлтийн ажлыг эхлүүлэхдээ иргэдийн хашааны газрыг үнэ цэнтэй болгох зорилгыг хамгийн эхэнд тавьсан байна. Улмаар тухайн иргэний хашааг байраар солих хамтарсан гэрээ байгуулж эхэлжээ. Өөрөөр хэлбэл, энэхүү төслөөр Э.Бат-Үүл дарга иргэдэд хашаа нь үнэ цэнтэй хөрөнгө шүү гэдгийг ойлгуулахыг хүссэн аж.
Энэ дахин төлөвлөлтийн ажлын хүрээнд газар чөлөөлөлт 2015 онд орон сууцны барилга, бүтээн байгуулалт, нийгмийн дэд бүтцийн болон инженерийн дэд бүтэц, авто замын барилга угсралтын ажилд зориулан гэр хорооллын дахин төлөвлөлтийн төсөл хэрэгжүүлэгч 38 компаниас 21 төсөл хэрэгжүүлэгч нийт нэг мянга 360 нэгж талбарын 86.5 га газрыг чөлөөлжээ. Харин дээрх нэгж талбараас 500 өрхийг гэр хорооллын дахин төлөвлөлтийн төслийн хүрээнд баригдсан орон сууцаар хангасан байна. Гэр хорооллын дахин төлөвлөлтийн хүрээнд төсөл хэрэгжүүлэгч аж ахуйн нэгжүүдийг дэмжих бүтээн байгуулалтын ажилд дэмжлэг үзүүлэх зорилгоор дахин төлөвлөлтийн төсөл хэрэгжиж буй байршилд улс, нийслэлийн төсвийн хөрөнгө оруулалт болон бондын хөрөнгө оруулалтаас 2013-2014 онд нийтдээ 147.7 тэрбум төгрөг, 2015 онд нийслэлийн төсвийн хөрөнгө оруулалтаас 40.5 тэрбум төгрөгийг зарцуулжээ.
