Төвийн аймгуудын ихэнх нутаг, зүүн аймгуудын нутгийн баруун хэсгээр бороо орно

Өнөө шөнө баруун болон төвийн аймгуудын нутгийн хойд хэсгээр, маргааш өдөр нутгийн баруун хагаст бороо орж, сэрүүсч, салхи, шуургатай байхыг малч­ид, иргэд, хадланчдад Цаг уур, орчны шинжилгээний газраас онцгойлон анхаарууллаа. 

Улаанбаатар хот орчмоор өнөө оройны 20:00 цагаас маргаашийн 20:00 цаг хүртэлх хугацаанд үүлшинэ, шөнөдөө бороо орохгүй. Харин өдөртөө дуу цахилгаантай аадар бороо орох бөгөөд салхи баруун өмнөөс секундэд 6-11 метр, шөнөдөө 11-13 градус, өдөртөө 23-25 градус дулаан байх аж. 

2020 оны наймдугаар сарын 27-31-нийг хүртэлх цаг агаарын урьдчилсан төлвөөс харвал: 

• 8 сарын 27-нд баруун аймгуудын нутгийн зүүн хэсэг, говийн аймгуудын нутгийн зарим газар, төвийн аймгуудын ихэнх нутаг, зүүн аймгуудын нутгийн баруун хэсгээр,
• 8 сарын 28-нд баруун аймгуудын нутгийн баруун хэсэг, төв болон зүүн аймгуудын ихэнх нутаг, говийн аймгуудын нутгийн зарим газраар,
• 8 сарын 29,30-нд нутгийн зарим газраар усархаг бороо орно.

Харин салхи 27-нд зарим газраар түр зуур секундэд 16-18 метр, бусад хугацаанд секундэд 6-11 метр, борооны өмнө түр зуур ширүүснэ. 

Ихэнх нутгаар сэрүүсэж Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Идэр, Тэс голын хөндийгөөр шөнөдөө нэг градус хүйтнээс 4 градус дулаан, өдөртөө 11-16 градус, говийн бүс нутгийн өмнөд хэсгээр шөнөдөө 12-17 градус, өдөртөө 23-28 градус, бусад нутгаар шөнөдөө 6-11 градус, өдөртөө 15-20 градус дулаан байна.