Чингэлтэй дүүрэгт вакцины нэгдүгээр тунд хамрагдсан нялх биетэй эмэгтэй нас барсан талаар мэдээлэл цацагдаад байгаа. Өчигдөр (2021.05.11) нийгмийн сүлжээнд нэгэн хэрэглэгч “Амаржаад сар гаруйхан болсон ээж маань хятад вакцин хийлгээд, маргааш нь нас барчихлаа” гэдэг мэдээллийг өөрийн цахим хуудсандаа нийтэлсэн байсан юм. Энэ талаар талийгаачийн охин "Ээж маань тавдугаар сарын 9-ний өглөөний 10 цагийн үед “Ээж нь вакцинаа хийлгээд ирье. Хөхний сүүгээр дамжаад хүүхдэд бас дархлаа тогтдог гэж бичсэн байна. Тэгэхээр эрт хийлгэсэн нь дээр байх. Дүүгээ хараад байж байгаарай" гээд явсан. Вакцинаа Долоон буудлын дээд талд байдаг нийслэлийн Нийтлэг үйлчилгээний газрын байранд очиж хийлгэсэн. Хятад вакцин хийлгэсэн. Хийлгэхээр очихдоо “Амаржаад сар гаруй болсон хүн хийлгэж болох уу” гээд асуухад “болно” гэсэн байна лээ. Тэгээд “даралт ч үзсэнгүй. Болно оо” гээд хийчихлээ гээд л гэртээ ирсэн. Ингээд маргааш нь 21.40 цагийн үед бие засахаар гэрээсээ гарсан ч удаад байхаар нь араас нь гартал бие засах газрын үүдэнд уначихсан байсан. Би маш их айсан. Ээж минь ямар ч амьсгалгүй, хөдөлгөөнгүй болсон байсан. Ингээд Түргэн тусламж дуудсан. Тэд ирээд “хожимдсон байна” гэсэн мэдээлэл өгөөд байгаа юм. Харин ЭМЯ-аас Вакцинаас болж хүн нас барсан эсэхийг Шүүх шинжилгээний хүрээлэн эцэслэн тогтооно гэсэн мэдээллийг өглөө.
