Хэнтий, Сэлэнгэ аймагт өчигдөр буюу дөрөвдүгээр сарын 01-ний өдөр хээрийн гал түймэр гарч нийт 29 га талбай өртөж сүйдсэн байна.
Энэ талаар ОБЕГ-аас "Хэнтий аймгийн Дэлгэрхаан сумын Хэрлэн тооно багийн “Хаяа” гэдэг газар /аймгийн төвөөс баруун зүгт 150 км, сумын төвөөс зүүн урд зүгт 24 км/ хээрийн гал түймэр гарсан тухай дуудлагыг 04.01-ний өдрийн 13:11 цагт хүлээн авсан. Тус аймгийн Дэлгэрхаан сумын Засаг даргын Тамгын газрын ажилчид, орон нутгийн иргэд хээрийн гал түймрийг унтраах ажиллагааг зохион байгуулан ажиллаж 13:40 цагт цурамд оруулан, 15:30 цагт бүрэн унтраасан. Урьдчилсан байдлаар хээрийн гал түймэрт 8 га талбай өртөж шатсан.
Сэлэнгэ аймгийн Баянгол сумын 3 дугаар багийн “Урт хамар” гэдэг газар /аймгийн төвөөс урд зүгт 187 км, сумын төвөөс зүүн урд зүгт 20 км/ хээрийн гал түймэр гарч байна гэсэн дуудлагыг 04.01-ний өдрийн 13:18 цагт хүлээн авсан. Тус аймгийн Онцгой байдлын газрын Баянгол сум дахь 40 дүгээр ангийн алба хаагчид, сумын Засаг даргын Тамгын газрын ажилчид, орон нутгийн иргэд хээрийн гал түймрийг унтраах ажиллагааг зохион байгуулан ажиллаж 14:15 цагт цурамд оруулан, 15:27 цагт бүрэн унтраасан. Урьдчилсан байдлаар хээрийн гал түймэрт 21 га талбай өртөж шатсан" гэх мэдээллийг өглөө.
.jpg?1743133130084)