10.00 цагт Моннис цамхаг, 14 давхарт Тавантолгойн нүүрсний давхаргын метан хийн нөөцийг тодорхойлох судалгааны ажлыг хамтран гүйцэтгэх зорилгоор “Эрдэнэс Метан” ХХК, “Элгэн” ХХК болон БНСУ-ын төрийн өмчийн “Korea Gas Corporation” хооронд "Хамтын ажиллагааны гэрээ"-нд гарын үсэг зурах ёслол болно.
10:00 цагт СХД-ийн 20 дугаар хороо, Сонсголонгийн гүүрний ард байрлах "Грийн сити гарден" ХХК-ийн хүлэмж, зоорийн цогцолбор дээр "Хүлэмжийн аж ахуйд ургамалын хорио цээрийн дэглэм мөрдөх нь" сэдэвт өдөрлөг зохион байгуулагдана. Тус арга хэмжээнд нийслэлийн хэмжээнд ургамалын гаралтай түүхий эд, бүтээгдэхүүн бэлтгэн нийлүүлэгч аж ахуйн нэгж, иргэд оролцох юм.
10:00 цагт Үндсэн хуулийн цэцийн байранд хэсэг иргэд Цэцийн дарга Ж.Амарсанааг эгүүлэн татсан асуудал нь Үндсэн хууль зөрсөн гэсэн үндэслэлээр Үндсэн хуулийн цэцэд өргөдөл гаргасан боловч хуулийн хугацаа нь дуусгавар болчихоод байхад энэ асуудлыг хэлэлцэхгүй, тодорхой хариу өгөхгүй байгаа аж. Иймд тэдгээр иргэд Үндсэн хуулийн цэцэд шаардлага хүргүүлэх юм байна.
11.00 цагт “Монгол ньюс” мэдээллийн төвд “Ботаникийн цэцэрлэгээ аваръя” түр хорооноос Ботаникийн цэцэрлэгийн газрын асуудлаар мэдээлэл хийнэ.
11:00 цагт Монгол Улсын Үндэсний номын сангийн Их уншлагын танхимд “Үндэсний бичиг үсгийн баяр-2016” болно.
11:40 цагт АН сонгуульд оролцох хүсэлтээ СЕХ-нд өгнө.
12:00 цагт Д.Нацагдоржийн нэрэмжит Улаанбаатар хотын нийтийн төв номын сангийн Хөтөлбөрийн танхимд Дэлхийн номын, зохиогчийн эрхийн, үндэсний бичиг соёлын өдрийг тохиолдуулан харааны бэрхшээлтэй хүмүүст зориулан бүтээгдсэн (daisy) болон брайль номын нээлт болно.
12:00 цагт Мишээл экспод "Барилга Экспо 2016" нээлт болно. Нээлтэнд БХБ-ын сайд З.Баянсэлэнгэ, тус газрын дарга нар, МХАҮТын ерөнхийлөгч Б.Лхагважав болон Барилгын Хөгжлийн Төв, ТББ-ын төлөөллүүд оролцоно.
12.00 цагт Чингисийн талбайд "Шударга сонгуулийн төлөө" эсэргүүцлийн цуглаан болно. Тус цуглаанд МАХН, МҮАН, ИЗНН-ын удирдлага, гишүүд оролцоно. Тэд сонгуулийг шударга явуулахад олон нийтийн анхаарлыг хандуулах, ҮХЦ улс төрийн нөлөөнд автаж, нэг ижил маргаанд хоёр өөр дүгнэлт гаргаж байгааг эсэргүүцэж буйгаа илэрхийлэх юм.
12:00 цагт “Аз хур” номын их дэлгүүрт Л.Оюун-Эрдэнийн "Алсын хараа" номын 10 дахь хэвлэлийн баяр болно.
15:00 цагт Г.Занабазарын нэрэмжит Дүрслэх урлагийн музейд Дэлхийд алдартай С.Дали ба П.Пикассогийн уран бүтээлийн үзэсгэлэнгийн талаарх хэвлэлийн бага хурал, нээлтийн ажиллагаа болно. С.Дали, П.Пикассо нарын уран бүтээлийнхээ хамгийн оргил үед бүтээсэн уран баримал, уран зураг, зураасан зураг, керамик урлалын эх бүтээлүүдийг Монголд анх удаа дэлгэн үзүүлэх юм.
