Бусдад сайн үйл бүтээж байгаа хүн өөртөө ч сайн үйлийг хамт бүтээж, буян хураадаг гэдэг үг бий. Хүний төлөө хийсэн сайн сайхан үйлийнхээ үр дүнг харж, эрэгцүүлэн бодохоор асар их хөөр баярыг сэтгэл зүрхэндээ мэдрэх тэр сайхан мэдрэмжийг та нэг биш удаа мэдэрсэн л байх. Ингээд “Нийгэмд тустай сайн мэдээ түгээх аян”-ы хүрээнд уншигч таньд сэтгэлийн амар амгаланг эдлүүлэх эерэг мэдээлэлүүдийг хүргэдэг өнөөдрийн “Сайн”-ыг уншигч танд тоймлон хүргэж байна.
ХӨСҮТ-д Зохиомол амьсгалын аппарат ирлээ
Сүүлийн үед Улаанбурхан өвчний дэгдэлт буурч байгаа ч ХӨСҮТ ачаалалаа дийлэхгүй хүндхэн нөхцөлд ажиллаж байгаа билээ. Учир нь тус төвийн Сэхээн амьдруулах тасгийн аппаратууд хүрэлцдэггүй. Тэгвэл энэ асуудлыг шийдсэн нэгэн сайн мэдээг дуулгаж байна. Тус төвд цөөхөн байдаг Зохиомол амьсгалын аппарат ХӨСҮТ-д иржээ. Энэхүү аппаратыг сарын өмнө авахаар шийдсэн байсан бөгөөд өнөөдөр ийнхүү ирсэн байна. Түүнчлэн тун удахгүй дутагдалтай байгаа өвчний хяналтын монитор ирэх аж. Ингэснээр тус эмнэлгийн Сэхээн амьдруулах тасагт дутуу аппарат хэрэгсэлгүй болж, тоног төхөөрөмжөөр бүрэн хангагдах юм байна.
АСЕМ-д зориулсан техникийн тусламжийг хүлээлгэн өгөв
БНХАУ-ын Засгийн газраас Монгол Улсад олгох техникийн буцалтгүй тусламж төслийн эхний ээлжийн тоног төхөөрөмжийг хүлээлгэн өгөх ёслол өнөөдөр Чингис хаан олон улсын нисэх буудалд болсон юм. Уг төхөөрөмж нь Ази-Европын дээд түвшний 11 дүгээр уулзалтын бэлтгэл ажлын хүрээнд олгож байгаа аж. Зам арчилгаа цэвэрлэгээний тусгай тоноглосон 15 машин, Нисэх буудалд ашиглагдах тусгай зориулалтын 11 машин, техник, тоног төхөөрөмж, Гал командын нэг машин, Цагдаагийн өмсгөл, хэрэгсэл, Замын хөдөлгөөний аюулгүй байдлыг хангах тоног төхөөрөмжүүдийг өнөөдөр хүлээлгэн өгсөн сайн мэдээ дуулгая.
Эрүүл мэндийн өдөрлөг эхэллээ
МҮЭСТО-ноос санаачлан Эрүүл мэнд, спортын яамтай хамтран хоёр дахь жилдээ “Эрүүл урт наслалт” үзэсгэлэн, өдөрлөгийг зохион байгуулж байна. Уг үзэсгэлэн, өдөрлөг өнөөдөр эхэлсэн бөгөөд 7, 8-ны өрүүдэд үргэлжлэх юм байна. МҮЭСТО-ы үзэсгэлэнгийн танхимд 30 гаруй хувийн хэвшлийн байгууллага, компани оролцож ажил үйлчилгээ, үйл ажиллагаа, болон бүтээгдэхүүнээ сурталчилан таниулахаас гадна иргэд зөвлөгөө өгч, эрүүл мэндийн үзлэгт хамруулах юм байна.
Монголын маань цэлмэг тэнгэр ододтойгоо учирахаар догдлон алтан наран уулсын цаагуур өнгийх цаг мөчид Монгол оронд маань өнөөдөр болж өнгөрсөн зарим үйл явдлуудаас Сайн мэдээг онцлон дуулгалаа.“Нийгэмд тустай сайн мэдээ түгээх аян”-ы санаачлагч “Эрдэнэт үйлдвэр” ХХК, зохион байгуулагч “Монголын сэтгүүлчдийн нэгдсэн эвлэл”, түгээн дэлгэрүүлэгч chuhal.mn сайт.
Босоо заяат Монгол түмний минь заяа хийморь нь үргэлж өөдөө байж, дуу шиг уянгатай, сүү шиг өнгөтэй сайн мэдээ бүхэн тархан цуурайтах болтугай. Сайн үйлс бүхэн өнгөжин дэлгэрч, цагаан сүүний цацал адил өөдлөн дэвжих нь лавтай.
www.Chuhal.mn
