Хүн бүр дотор сэтгэлдээ урмын сайхан үгийг ямагт хүсч явдаг. Хийж бүтээснийхээ төлөө, бусдыг баярлуулсны төлөө хэн нэгнээс сонсох талархал, урмын сайхан үгс нь хүний сэтгэл зүрхэнд баяр баясгалан авч ирж, шувуу мэт дүүлэн нисэх хүсэл тэмүүллийг өгдөг. Аав ээждээ магтуулж, сайхан үг сонссон бяцхан хүүхдийн нүд нь очтон гялалзаж, өөрөө ч мэдэлгүй хөөрч онгирох нь үнэхээр өхөөрдмөөр хөөрхөн харагддаг.
Бусдад урмын сайхан үг хэлж, бусдыг баярлаж байхыг харахдаа өөрөө ч баярлаж баясдаг хүмүүс ямагт өөрөөсөө гэрэл гэгээ цацруулж өнгөлөг сайхан харагдана. Бурмаар тэтгэхээр, урмаар тэтгэ гэсэн сайхан үг байдаг. Хажуудах хайртай бүхэндээ, амьсгалж буй агаар, хажууд тань буй цэцэг навчист хүртэл “баярлалаа” гэж чин сэтгэлээсээ хэлээрэй. уншигч та бүхэндээ “Нийгэмд тустай сайн мэдээ түгээх аян”-ы хүрээнд уншигч таньд сэтгэлийн амар амгаланг эдлүүлэх эерэг мэдээлэлүүдийг үдэш болгоны энэ цаг мөчид хүргэж байгаа билээ. Өнөөдрийн “Сайн”-ыг уншигч танд тоймлон хүргэж байна.
Сэргээн засах профессорын багийн багш Ц.Наранцэцэг, ЭХЭМҮТ-ийн сэргээн засахын эмч Д. Болормаа нар тархины саажилттай долоон хүүхдэд нийт 3600 ам.долларын үнэ бүхий ботокс эмчилгээг үнэ төлбөргүйгээр хийж өгсөн таатай мэдээлэл өнөөдөр цацагдлаа.
Азербайжаны нийслэл Баку хотноо жүдо бөхийн холбооны олимпийн эрх олгох "Их дуулга" тэмцээн амжилттай болж өнгөрлөө. Тус тэмцээнд оролцсон Г.Болдбаатар дэлхийн чансааг тэргүүлж эхэлсэн сайхан мэдээ байна. Харин дараагийн бидний хүргэх мэдээлэл бол Оросын Иркутскийн их сургуулийн эрдэмтэд шинэ төрлийн антибиотик нээжээ гэсэн мэдээлэл байна. . Энэхүү антибиотик нь хорт хавдар болон элдэв нян вирусыг устгах боломжтой хэмээн судалгааны багынхан мэдээллэсэн байна. Оюутолгойн ордыг ашиглах үйл ажиллагааны шинэ шатны гараа болох гүний уурхайн төслийг эцэслэн баталж, гүний уурхайн бүтээн байгуулалт эхэлж байна. Гүний уурхайн төс¬лийн гарааны хүндэтгэлийн ёслол өнгөрсөн бямба гаригт боллоо.
Монголын маань цэлмэг тэнгэр ододтойгоо учирахаар догдлон алтан наран уулсын цаагуур өнгийх цаг мөчид Монгол оронд маань өнөөдөр болж өнгөрсөн зарим үйл явдлуудаас Сайн мэдээг онцлон дуулгалаа.“Нийгэмд тустай сайн мэдээ түгээх аян”-ы санаачлагч “Эрдэнэт үйлдвэр” ХХК, зохион байгуулагч “Монголын сэтгүүлчдийн нэгдсэн эвлэл”, түгээн дэлгэрүүлэгч chuhal.mn сайт.
Босоо заяат Монгол түмний минь заяа хийморь нь үргэлж өөдөө байж, дуу шиг уянгатай, сүү шиг өнгөтэй сайн мэдээ бүхэн тархан цуурайтах болтугай.
Сайн үйлс бүхэн өнгөжин дэлгэрч, цагаан сүүний цацал адил өөдлөн дэвжих нь лавтай
www.Chuhal.mn
