Хүн сэтгэлийн амьтан. Сэтгэлдээ сайн сайхан зүйлийг бодож, санаж, олж харж чадвал амьдрал өөрөө гэрэл гэгээтэй болдог. Тиймээс амьдралдаа үргэлж өөдрөг сайхныг бодож, илүү өнгөлөг сайхан бүхэн рүү тэмүүлж байгаарай. Үдэш болгоны энэ цагт уншигч та бүхэндээ хүргэдэг “Сайн”-ыг тоймлов булангаа хүргэж байна.
"Сайн хашаа"-тай өрхөд 10 саяын зээл олгоно
Иргэдийн эрүүл, аюулгүй амьдрах нөхцөлийг бий болгох зорилгоор “Сайн хашаа” хөтөлбөр болон хөтөлбөрийг хэрэгжүүлэх зээлийн ерөнхий журмыг баталлаа. Тус хөтөлбөрийн хүрээнд "Сайн хашаа"-тай өрхөд 10 саяын зээл олгох талаар сайн мэдээг дуулгая.Мөн үүнээс гадна, гол дүрд нь жүжигчин А.Мөнгөнзул тоглосон "ДОЗ ПЛАС" энтертайнтэнтын уран бүтээл болох "Элэг Нэгтэн" Олон улсын кино наадамд амжилттай оролцжээ. Улмаар уг кино олон улсын 3 дахь кино наадамд амжилттай оролцсон байна. Удахгүй Энэтхэг, Хойд Солонгос, Японы кино наадамд уригдаад байгаа сайн мэдээг энэ удаад онцоллоо. Баянзүрх дүүргийн 11 дүгээр хороо буюу Хонхор, Гачуурт тосгоны нутаг дэвсгэр дэх Туул, Улиастай, Сэлбэ голын ай сав газар болон зуслангийн бүсийн хогийг цэвэрлэжээ. Их цэвэрлэгээгээр нийт 120 тонн хог хаягдлыг 22 машинаар 50 удаагийн рейсээр ачиж тээвэрлэсэн сайн мэдээг хүргэж байна.
Ховд аймгийн Мөнххайрхан сумын нутагт орших Үзүүр гялан гэдэг газраас олдсон хадны булшин дахь олдвор Улаанбаатар хотод авч ирж сэргээн засварлаж эхэлсэн байна. Судалгаагаар 6-7 дугаар зууны үе буюу одоогоос 1500 гаруй жилийн өмнөх үеийнх гэж тогтоосон сайн мэдээгээр энэ удаагийн “Сайн”-ыг тоймлов булангаа өндөрлөе.
Монголын маань цэлмэг тэнгэр ододтойгоо учирахаар догдлон алтан наран уулсын цаагуур өнгийх цаг мөчид Монгол оронд маань өнөөдөр болж өнгөрсөн зарим үйл явдлуудаас Сайн мэдээг онцлон дуулгалаа.“Нийгэмд тустай сайн мэдээ түгээх аян”-ы санаачлагч “Эрдэнэт үйлдвэр” ХХК, зохион байгуулагч “Монголын сэтгүүлчдийн нэгдсэн эвлэл”, түгээн дэлгэрүүлэгч chuhal.mn сайт.
Босоо заяат Монгол түмний минь заяа хийморь нь үргэлж өөдөө байж, дуу шиг уянгатай, сүү шиг өнгөтэй сайн мэдээ бүхэн тархан цуурайтах болтугай.
Сайн үйлс бүхэн өнгөжин дэлгэрч, цагаан сүүний цацал адил өөдлөн дэвжих нь лавтай
www.Chuhal.mn
