Нөлөө бүхий улстөрчид татвараас зайлсхийж, мөнгө угаасан баримтыг дэлгэсэний дотор монголоос 49 хүн оффшор данстай нь нэгэнт илчлэгдсэн. Эдгээр хүмүүсийн дунд нэртэй улстөрч, бизнесменүүд, спортынхон багтсан нь олны анхаарлыг татаад байгаа. Мөн үүнээс гадна бизнес хийж яваа залуучууд, ямар бизнес хийдэг тодорхой бус залуухан охидуудын нэр хүртэл дурьдагдаад авлаа. Оффшор данстай гэх улс төрийн эрхэмүүд эхнээсээ тайлбар өгч эхэлсэн талаар түрүүн мэдээлэл хийсэн. Тодруулбал, Оффшор дансанд нэр нь холбогдсон УИХ-ын гишүүн Сү.Батболд, Барилга хот байгуулалтын сайд асан Д.Цогтбаатар нар өнөөдөр мэдээлэл хийж тус мэдээлэлийг үгүйсгэсэн. Сү.Батболдын хувьд “оффшор компани өөрөө байгуулаад данс эзэмшээд байгаа асуудал байхгүй. Оффшор компани, оффшор компанийн данс Д.Цогтбаатар бид хоёрын нэр дээр байхгүй гэдгийг албан ёсоор хэлье. Эл асуудлаар хууль хүчний байгууллагад хандаж, Сү.Батболд, Д.Цогтбаатар нар хууль зөрчсөн эсэхийг шалгуулна” гэв. Харин Барилга хот байгуулалтын сайд асан Д.Цогтбаатарын хувьд “Оффшор данс байхгүй” гэсэн хариултыг өгсөн. Одоогоор хэвлэл мэдээлэлийн хэрэгслэлд ярилцлага өгөөд эрхэмүүд дотроос нэгэн ч оффшор данстэй гэдгээ хүлээн зөвшөөрөхгүй байгаа. Тухайлбал, УИХ-ын гишүүн Д.Батбаярын хувьд “Оффшор данс гэдэг нь өөр оронд данстай иргэнийг хэлнэ гэж би бодож байна. Тэр утгаараа надад 3,4 оффшор данс байдаг. Гэхдээ тэр данс нь Японд байдаг. Идэвхигүй болчихсон данс юм” гэсэн хариулт хэлэв. Хамгийн дуулиан шуугиан болж, зэмлэл хүртэж байгаа эрхэм бол Хотын даргын хүү Б.Чулуудай. Түүнийг олон нийт “ Э.Бат-Үүл татвар нэмж байхад хүү нь татваргүй бүсэд мөнгөө нууж байгаа нь ариун явдал уу” хэмээн олон нийт сэтгэгдэлээ илэрхийлээд байна.
Б.Чулуудай оффшор дансны талаар хэлэхдээ “Гадаадад хамт суралцаж байсан Сингапурын иргэн найз маань санал тавьсан. “Стратежик майнинг” ХХК 2011 онд байгуулагдсан. 2013 онд хаагдсан компани. Энэ компани хөрөнгө оруулалт татаж чадаагүй учраас данс нээлгэж ч чадалгүй хаагдсан. Ерөөсөө данс нээгээгүй, дансгүй учраас мөнгө ч орж гараагүй” хэмээн өөрийгөө өмөөрлөө. Эдгээр эрхэмүүд дотроос нэгэн ч оффшор дансаа хүлээн зөвшөөрсөнгүй. УИХ-ын гишүүн Ж.Батзандан энэ талаар хэвлэлд өгсөн ярилцлагандаа улс төрчид өөрсдийн нэр дээр данс нээдэггүй гэр бүл, хамаатан садныхааа нэр дээр нээдэг талаар ярилцлага өгсөн байна. Энэ бас ташаа мэдээлэл биш байгаа нь харагдаж байна.
МАН-ын Ц.Сандуйгийн дүү Ц.Сэргэлэн оффшортнуудын эгнээнд багтлаа
Дуулиан шуугиантай эдгээр эрхэмүүдтэй зэрэгцээд МАН-ын Ц.Сандуйгийн дүү Ц.Сэргэлэн нууц ноёнтонуудын эгнээнд багтсан байна. Ц.Сэргэлэн гэх хүний хувьд Виржиний арлуудад бүртгэлтэй "Joy Key Develoment Limited" компанид 2011 оны нэгдүгээр сарыг хүртэлх хугацаанд хувьцаа эзэмшиж байсан аж. УИХ-ын гишүүн Сү.Батболдын ах хүртэл оффшортнуудын эгнээнд багтсан байгаа тэрбээр хүлээн зөвшөөрсөнөө өнөөдөр хэвлэлийн хурлын үеэр хэлсэн. Харин Ц.Сандуй болон түүний дүүгийн зүгээс одоохондоо ямар нэгэн тайлбар өгөөгүй байгаа юм. Ц.Сандуй нь Нийслэлийн Газрын албаны даргаар ажиллаж байсан нэгэн бөгөөд түүнийг газрын албаны даргаар ажиллаж байх үед хууль бус газрын наймаа, газар өмчлөл хүчээ авсан талаар одоо ч яригддаг. Одоо тэрбээр МАН-аас НИТХ-д нэр дэвшээд байгаа.
Цэндсүрэнгийн Сандуй, Цэндсүрэнгийн Сэргэлэн нар унаган хотын иргэд. Тэдий аав Цэндсүрэн гуай хотын намын хорооны намын хянан шалгах комиссын дарга байсан нэгэн. Харин ээжийнх нь хувьд Статистикийн товчоонд мэргэжилтэнээр 20 жил тасралтгүй ажиллаж байсан аж. Цэндсүрэнгийн Сэргэлэнгийн хувьд хаана юу хийдэг нь одоогоор нууц байна.
