“Номын баяр” өнөөдөр 20:00 цаг хүртэл үргэлжилнэ

Чингисийн талбай дээр олон улсын соёлын үзэсгэлэн, номын баяр хоёр дахь өдрөө үргэлжилж байна. Номын баярт 100 хэвлэн нийтлэгч, 300 гаруй зохиолч, уран бүтээлчид оролцож байгаа юм. 19 дахь жилдээ зохион байгуулагдаж буй энэ удаагийн баярын онцлог нь 7-8 орны 100 гаруй хүүхэд, залуучууд  анх удаагаа хүрэлцэн ирж өөрийн орны соёлыг сурталчилж буй.  Монгол Улсад түр болон байнгын оршин суугаа Солонгос, Герман, Хятад, АНУ, Япон зэрэг улсын иргэд үндэсний хувцас болон хоол хүнсний танин мэдэхүйн үзэсгэлэнг дэлгэсэн байна.Өчигдөр номын баярын нээлтийн үеэр АУЗ Т.Галсан, П.Бадарч болон зохиолч Б.Сарантуяа, Б.Шүүдэрцэцэг, Г.Мэнд-Ооёо зэрэг зохиолчид ирж өөрийн номыг гарын үсгийн хамт 10-50 хувийн хөнгөлөлттэй үнээр худалдаалсан юм. Тэд  хүндэтгэлийн арга хэмжээнд оролцохоос гадна “Ном яръя, кофе ууя” чөлөөт ярилцлагаар хүүхэд, залуустай уулзсан. Энэ үеэр номын зохиолчидтойгоо уулзаж, зургаа авахуулах боломжтойгоос гадна ном ярьж кофе ууж, суух орчныг бүрдүүлжээ. "Номд дурлаж, мэдлэгт шүтэх, найрсаг хотын иргэд" уриатай номын баяр өнөөдөр, 20:00 цаг хүртэл үргэлжилнэ.