Байгаль хамгаалагч залуу амиа алдсан хэрэгт олон нийт төдийгүй УИХ-ын зарим гишүүн хүртэл анхаарлаа хандуулж байгаа.Талийгаач залуу нийслэл дэх гэрээсээ "Машинаа гаражид хийгээд ирье" хэмээн гараад зургаан хоногийн дараа Хөвсгөлөөс амиа алдсан байдалтайгаар олдсон юм. Тиймээс УИХ-ын гишүүн Ц.Оюунгэрэл, Н.Алтанхуяг нар энэ хэрэг дээр хамтарч ажиллахаа мэдэгдсэн. Энэ нь гадны нөлөөтэй хэмээн ар гэрийнхэн нь үзэж, цагдаагийн байгууллагаас гомдол гаргаад байгаа билээ. Гомдлын дагуу УМБГ-аас ажлын хэсэг байгуулагдан байгаль хамгаалагч залуугийн амиа алдсан шалтгааныг тодруулахаар ажиллаж байна. Тэгвэл талийгаач залуугийн амиа алдсан хэрэгт "Гацуурт"-ын Л.Чинбат анхаарлаа хандуулж эхэлжээ. Тэрбээр өөрийнхөө фэйсбүүк хуудаснаа "Талийгаач залуугийн амиа алдсан талаарх мэдээллийг өөрийн зүгээс 10 сая төгрөгөөр худалдан авна" гэж бичжээ.
