Хүний төлөө сэтгэл зүрхээ зориулж хийсэн буянтай үйл болгон үнэ цэнэтэй. Ингээд өнөөдрийн сайн мэдээг хүргэдэг “Сайн”-ыг тоймлов булангаа хүргэж байна.
Төв аймагт 800 хүний суудалтай шинэ театр удахгүй ашиглалтад орох юм байна. Хоёр жилийн өмнө эхэлсэн барилгын ажлын явц одоогоор 80 хувьтай байгаа бөгөөд энэ жилдээ багтан ашиглалтад орох таатай мэдээг онцолж байна.
APU компанийн хамт олны зүгээс хүрээлэн буй орчны бохирдол, хүний буруутай үйлдлээс шалтгаалан бий болсон хог хаягдлыг багасгах зорилготойгоор “Тунгалаг Туул” аяныг зохион байгуулж байна. Хан-Уул дүүргийн нутаг дэвсгэрт байрлах Зайсангийн гүүрнээс Яармагийн гүүр хүртэлх голын эрэг дагуу нийт 28 га газар талбайг цэвэрлэж 23,5 тонн хогийг ТҮК-ний хог ачих машинуудад ачуулж, голын ойр орчимд хогийн сав байрлуулсан мэдээг дуулгахад таатай байна.
Иран улсаас жил бүр зохион байгуулдаг “Олон улсын усан будгийн зургийн тэмцээн”-ий энэ оны шилдгээр зураач С.Мөнхбаатар түрүүлж, Монголын усан будгийн зургийн хөгжлийг дэлхийд таниулж байгаа сайн мэдээг дурдая.
Уулын спортын ОУХМ Б.Цэвээндаш Дэлхийн дээвэр Эверестийн оргил өөд хойд замаар хоёр дахь удаагаа авирч оргилд амжилттай гарч чаджээ. Б.Цэвээндашийн энэхүү авиралт нь Эверест ууланд хийсэн гурав дахь авиралт болж байна.
Монголын маань цэлмэг тэнгэр ододтойгоо учирахаар догдлон алтан наран уулсын цаагуур өнгийх цаг мөчид Монгол оронд маань өнөөдөр болж өнгөрсөн зарим үйл явдлуудаас Сайн мэдээг онцлон дуулгалаа.“Нийгэмд тустай сайн мэдээ түгээх аян”-ы санаачлагч “Эрдэнэт үйлдвэр” ХХК, зохион байгуулагч “Монголын сэтгүүлчдийн нэгдсэн эвлэл”, түгээн дэлгэрүүлэгч chuhal.mn сайт.Босоо заяат Монгол түмний минь заяа хийморь нь үргэлж өөдөө байж, дуу шиг уянгатай, сүү шиг өнгөтэй сайн мэдээ бүхэн тархан цуурайтах болтугай.
Сайн үйлс бүхэн өнгөжин дэлгэрч, цагаан сүүний цацал адил өөдлөн дэвжих нь лавтай
www.Chuhal.mn
