Төр түшилцэж яваа эрхэмүүд сүүлийн үед төрөл садан, эхнэр нөхөр, ах дүү, баз хүргэн, аав нь хүүтэйгээ зууцай холбон УИХ-д нэр дэвшдэг моод тогтжээ. Хамгийн сүүлд гэхэд л МАХН-ын дарга Н.Энхбаяр энэ сонгуулиар Сонгинохайрхан дүүргийн 75 дугаар тойрогт нэр дэвшихээр зүтгэсэн ч ялтайд тооцох хугацаа дуусаагүй учраас дэвших боломжгүй болсон. Нэгэнт нэр дэвших боломжгүй болсон Н.Энхбаяр зүгээр ч нэг өнгөрөөгүй бөгөөд өөрийн оронд эхнэр Цолмонгоо нэр дэвшүүлж, батламжаа гардаж авсан. Намбарын хүү тийм ч амар бууж өгөхгүй гээд өөрөө чадахгүй юмаа гэхэд эхнэрээ УИХ-д сойж, хөшигний цаанаас улс төрийг удирдахаар шийдэв. Нөхөр нь чадахгүй бол эхнэрээ дэвшүүлдэг “моод” Ард түмнээ хайрлая намын дарга Ламжавын Гүндалайгаар үргэлжлэв. Түүний хувьд эртнээс Эрдэнэтээс нэр дэвшихээр шийдэн бэлтгэл, хийж байсан. Харамсалтай нь газрын маргаанаас үүдэн Эрдэнэт хотын иргэдийг чацгаар нь дуудан нэр хүндээ алдсан. Ламжавын Гүндалайгийн хувьд өөрөө чадахгүй учраас эхнэр Л.Аззаяагаа тус аймагт нэр дэвшүүлэхээр боллоо.
