Дөрвөн жилд нэг удаа эрхээ эдэлж, улс төрийн сонголтоо хийхэд хэдхэн хоног үлдэж байна. Сонгууль хаяанд ирсэн энэ өдрүүдэд иргэд нэр дэвшигчдийн хэн нь хэн бэ гэдэгт өөрсдийн үнэлэлт дүгнэлтээ хийж байна. Нэр дэвшигчдийн хувьд өөрсдийгөө хэн бэ гэдгээрээ харуулж, юу хийсэн, юу хийх гэж байгаагаа танилцуулдаг шалгалтын өдрүүд юм. Энэ өдрүүдэд зарим нэр дэвшигчдийн хэн нь хэн бэ гэдгийг ард түмэн төвөггүйхэн ойлголоо. Юу хэлэх гэж байгааг та ойлгож байгаа байх. Өнгөрсөн долоо хоногт монголын улс төр тэр дундаа эмэгтэй гишүүний ёс зүйд байж боломгүй ааш авир гаргасан УИХ-ын гишүүн Л.Эрдэнэчимэгийн нэгэн бичлэг цахим ертөнцөд дуулиан тарьж, багагүй шуугиан дэгдээлээ. Архи ууж, тамхи татсан бичлэгнийхээ талаар УИХ-ын гишүүн Л.Эрдэнэчимэг хэвлэлийн бага хурал хийж, ард түмнээсээ уучлалт гуйж мөн ажлын байран дээрээ тамхи татсаны торгууль болох 50 мянган төгрөгийг төлсөн хэмээн мэдээлэл хийсэн. Үүний хажуугаар хамгийн их анхаарал татсан зүйл нь уг бичлэгийг хийсэн, хадгалсан УИХ-ын гишүүн Г.Уянга байлаа. Тэд архи ууж, тамхи татсан бичлэгээ өнгөрсөн хоёрдугаар сарын 16-ны өдөр буюу Л.Эрдэнэчимэгийн төрсөн өдрөөр хийсэн бөгөөд алдагдах хүртлээ УИХ-ын гишүүн Г.Уянгын утсанд хадгалагдаж байсан аж.
4 сарын турш хадгалагдсан бичлэг яагаад энэ өдрүүдэд алга болов. Энэ бүхнээс харахад итгэж явсан найз нөхөрийнхөө дуулиант бичлэгийг алдсан Г.Уянга хамгийн увайгүй улс төрч болж хувирч байгаа юм. Ханилж яваад нөхрөө, унаж яваад морио гэсэн үг байдаг. Нэг ангийн найздаа итгэж эрээ цээргүй хамаг юмаа ярьсан Л.Эрдэнэчимэг энэ бүхнээс хохирч үлдэж байгаа юм. Г.Уянга алдагдсан бичлэгийн талаар хэлэхдээ “ Энэ бичлэг Л.Эрдэнэчимэг бид хоёрыг холдуулж чадахгүй. Эрчүүд ямар арчаагүй юм бэ. Арчаагүй нийгэмээс болж байна. Миний гар утас хулгайд алдагдсан. Энэ бичлэгнээс болж бид хоёрыг муудалцсан хэмээн яригдаж байна. Харин ч бид улам батжиж, хамтрах хэрэгтэй” хэмээн нөгөө л нэг улс төрөө ярив. Түүний үгнээс ард түмнээсээ уучлалт гуйсан ганц ч үг гарсангүй. Харин ч эмэгтэйчүүдийг дарж авах гэсэн эрчүүдийг арчаагүй арга гэсэн зүйлийг ярив. Арилгасан сонгино шиг байж чадахгүй юмаа гэхэд төрөө дээдэлдэг байх хэрэгтэй. Сонгогчдоо таалагдахын тулд юу ч хамаагүй ярьж хэлж, ажил болгоныг мушгин гуйвуулдаг хүнийг эх оронч биш харин популист хэмээн нэрлэж ирсэн. Тэд хар юмыг ч цагаан болгоод цагаан юмыг хар болгоод ярьж, түүнийг улс төржүүлж чаддаг. Бас ямар ч хамаагүй үнээр нэр хүндэд хүрэх гэж санаархдагыг бид олон жишээнээс хардаг. Г.Уянга та үүнээс ялгарах зүйл алга. Эх оронч, шударга хэмээн үнэлж байсан хүмүүс эсрэгээрээ түүнийг популист хэмээн хочилж, увайгүй, улс төр хийсэн “гудамжны” хэмээн тодотгох болов. Эцсийн эцэст архи ууж, тамхи татсан хар бараан зүйлээ хэн нэгэн рүү чихэх хэрэггүй, архи тамхийг эрчүүд та нарын ам руу чихээгүй л мэдээж. Ийн хадгалагдаж байсан нэр дэвшигчийн “но”-той, “ноцтой” бичлэг 50 сая төгрөг хүрч, өндөр авав.
Эгзэг нь таарвал 50 сая төгрөг, 50 саяын зээл ядах юмгүй л олддог юм байна. Банк бол бичлэг үзээд зээл өгөхгүй, харин олгох зээлийг нь харилцагч цаг хугацаандаа төлж чадах уу гэдгийг нотлох хөрөнгө, орлого юу байна тэр бүгдийн баримтыг л шаардана. Нотолж чадахгүй бол зээл авах хаалга хаагдана хэмээн иргэд энэ үйл явдалд дүгнэлт хийж байна. Гэвч сонгуулийн энэ өдрүүдэд итгэж ядам үйл явдал өрнөж өнгөрлөө. Энэ бүхний эцэст увайгүй улс төрчид бидэнд хэрэгтэй юу. Төрөө дээдэлдэг, түмэн олныхоо төлөө тэмцдэг тэдний үгийг холбох гүүр болж чаддаг тийм л хүнд итгэл хүлээлгэх нь зөв. Төрийн ордноо баар цэнгээний газар болгодог, үүнийгээ өмөөрч улс төр хийдэг увайгүй улс төрчид бидэнд хэрэггүй.
УИХ-ын гишүүн Г.Уянга 2012 онд нэгэн хэвлэлд ярилцлага өгөхдөө “Гудамжинд, цардмал талбайд туршлага суусан он жилүүдээ би юугаар ч солихгүй” хэмээн ярилцлага өгч “Улс төрч гэж хэн юм бол” гэсэн сэтгүүчлийн асуултанд
-Олон түмний төлөө өөрийгөө золиослоход бэлэн бэлтгэгдсэн хүн. Гэхдээ асуудлыг шийдэхгүйгээр зүгээр л өөрийгөө зольчихдог хүн бол улстөрч биш шүү дээ. Үр дүн чухал. Нэг ийм үг байдаг. Ухаан ихэдвэл сэтгэл дутна, сэтгэл ихэдвэл ухаан дутна гэж. Аль алийг нь тэнцүүлж үр дүнд хүргэх тэр их ухаан жинхэнэ улстөрчөөс гарах ёстой байх. Албан тушаалтан бүхэн, сайд дарга, УИХ-ын гишүүн бүхэн улстөрч гэж би боддоггүй. Жинхэнэ улстөрчийн энд хүрсэн хүн тийм ч олон биш байх- гэсэн хариултыг өгсөн байна лээ. Харин одоо та найз нөхөд “Олон түмний төлөө өөрийгөө золиослоход бэлэн бэлтгэгдсэн хүн” мөн үү.
