Мэргэжлийн сүмо бөхийн дээд зиндаанд сэкивакэ цолтой барилдаж байсан Асасэкирюү Б.Дашням зодог тайлахаар шийджээ. Тэрээр зодог тайлсныхаа дараа Мэргэжлийн сүмо бөхийн холбоонд Нишикижима Ояаката нэртэйгээр үргэлжлүүлэн ажиллах бөгөөд Монголоос төрсөн гурав дахь Ояаката болж байна. Б.Дашням өнгөрсөн сард иргэншлээ сольж, япон улсын иргэн болсон. Асасэкирюү Б.Дашнямын амжилтын талаар товч өгүүлбэл, 1997 онд ёкозүна Асашёорюүгийн хамт арлын оронд очиж, Мэйтокү сургуульд элсэн орсон. 2000 оны нэгдүгээр сарын тэмцээнд мэргэжлийн сүмод анхны барилдаанаа хийж, Вакамацү дэвжээний улаан луу хэмээн барилдаж байлаа. 2002 онд жюүрёо, 2003 онд макүүчид дэвшин барилдаж, 2007 онд сэкивакэ цол хүртсэн юм.
