Төр нийгмийн нэрт зүтгэлтэн С.Зориг агсныг хөнөөсөн хэргийн шүүх хурал өнөөдөр хоёр дахь өдрөө үргэлжилж байна. Нийслэлийн прокурорын газраас Ц.Амгаланбаатар нарын гурван хүнд холбогдуулан яллах дүгнэлт үйлдэж ирүүлсэн эрүүгийн хэргийг Сүхбаатар дүүргийн Эрүүгийн хэргийн анхан шатны шүүх хянан хэлэлцэж байна.
18 жилийн дараа хоёр дахь өдрөө үргэлжилж байгаа шүүх хуралд хоёр гэрч оролцож байна. С.Зоригийн хэргийн нууцтай холбоотой баримтыг Г.Чулуунбат гэрчлэх бол Б.Содномдаржаагийн өмгөөлөгчийн хүсэлтээр Н.Давааням гэж хүн мөн гэрчээр оролцож байна. Н.Даваанямын хувьд Орхон аймгаас гэрчээр оролцохоор ирсэн байна. Тодруулбал, тус хэрэг гарсан өдөр буюу 1998 оны 10 дугаар сарын 02-ны өдөр шүүгдэгч Б.Содномдаржааг хаана байсан юу хийж байсан талаар гэрчлэх юм байна. Тэрбээр Б.Содномдаржааг цэрэгт татагдах үед ангийн дарга нь байсан аж.
Тэгвэл С.Зоригийн хэргийн нууцтай холбоотой баримтыг гэрчлэх Г.Чулуунбат гэж хэн бэ. Олон нийт түүнийг танихгүй. Бидний олж мэдсэн мэдээллээр Г.Чулуунбат нь С.Зоригийн бие төлөөлөгч нь байсан аж. Тухайн үедээ талийгаач С.Зориг нь Ц.Элбэгдоржийн засгийн газарт Дэд бүтцийн сайдын албыг хашиж байсан бол Г.Чулуунбат нь мөн л томоохон албан тушаалд очихоор яригдаж байсан нэгэн аж. Мөн үүнээс гадна Г.Чулуунбат талийгаачийн уулзалт үйлдэл бүрийг мэддэг байсан бөгөөд амиа алдахаасаа өмнө хэнтэй ямар хэргээр уулзсаныг гэрчлэх магадлалтай юм байна. Гэхдээ түүнийг хэн хөнөөснийг Г.Чулуунбат гэрчлэх боломжгүй. Хэрэг гарах үед хажууд нь цорын ганц гэрч байсан нь талийгаачийн эхнэр Б.Булган. Амьд гэрчтэй тус хэрэг 18 жилийн дараа дахин сөхөгдөж шүүх хурал нь болж байхад цорын ганц гэрч болох Б.Булган суухгүй байгаа нь олон нийтийн анхаарлыг өөрийн эрхгүй татаж байна. Шүүх хурал хоёр дахь өдрөө үргэлжилж байхад гэрч Б.Булган ирэх нь битгий хэл хамраа ч цухуйлгасангүй. Ийм байхад С.Зоригийн хэргийн нууцтай холбоотой баримтыг Г.Чулуунбат гэрчилж чадах нь эргэлзээтэй байна.
